Aqmolada memlekettik organ taqtaılardy 100 ese qymbatqa satyp almaq bolǵan

KÓKShETAÝ. QazAqparat - Aqmola oblysynda memlekettik organ qurylys taqtaılaryn kóterińki baǵamen satyp almaq bolǵan, dep habarlaıdy QazAqparat tilshisi Aqmola oblysy boıynsha sybaılas jemqorlyqqa qarsy is-qımyl departamentiniń baspasóz qyzmetine silteme jasap.

Vedomstvonyń málimetinshe, «Ashyq bıýdjet» jobasy aıasynda Aqmola oblysy boıynsha Sybaılas jemqorlyqqa qarsy is-qımyl departamenti «Aqmola - adaldyq alańy» jobalyq keńsesiniń mamandarymen birlesip bıýdjet qarajatyn paıdalanýdyń tıimdiligin baqylaý maqsatynda Ashyq bıýdjetterdiń ınteraktıvti kartasynyń Rublicbudget.kz saıtyna monıtorıng júrgizdi.

Monıtorıng qorytyndysy boıynsha Stepnogor qalasy bilim bóliminiń bıýdjettik baǵdarlama ákimgeri qylqan japyraqty aǵashtan tilingen taqtaılardy jalpy somasy 4 400 000 teńgege bir danasyn 80 000 teńgeden satyp alýdy josparlaǵany anyqtaldy.

Alaıda, qurylys materıaldary naryǵyn jáne basqa uıymdardyń memlekettik satyp alý josparlaryn taldaý barysynda uqsas taýardyń ortasha baǵasy bir taqtaı úshin 800-den 2000 teńgege deıin quraıtyny anyqtaldy.

Óńirdiń Sybaılas jemqorlyqqa qarsy vedomstvosynyń josparlanǵan taýarǵa ońtaıly baǵany qaıta qaraý jáne belgileý týraly usynystarynan keıin memlekettik organ memlekettik satyp alý baǵasyn tómendetti. Nátıjesinde bıýdjet qarajatynyń jalpy únemdelýi 4300 000 astam teńgeni qurady.

«Ashyq bıýdjetterdiń ınteraktıvti kartasy naqty ýaqyt rejıminde áleýmettik nysandardy salýǵa, jóndeýge jáne ustaýǵa bólingen bıýdjet qarajaty týraly egjeı-tegjeıli málimetterdi kórsetedi. Qazirgi ýaqytta Kartada óńir uıymdarynyń jalpy somasy 401,4 mlrd.teńgege 2800-den astam bıýdjeti ornalastyrylǵan», - deıdi vedomstvonyń baspasóz hatshysy Dınara Nurtaz.