Aqmolada memqyzmetshilerdiń jumys kúni «Para alma» degen eskertýden bastalady

KÓKShETAÝ. QazAqparat - Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń bastamasy boıynsha Kókshetaý qalasy ákimi apparatynda memlekettik qyzmetshilerdiń jumys kompıýterinde sybaılas jemqorlyqqa qarsy qalqymaly habarlama paıda boldy, dep habarlaıdy QazAqparat tilshisi vedomstvonyń baspasóz qyzmetine silteme jasap.

Memlekettik apparattyń árbir qyzmetkeri kompıýteriniń jumys ústelinde ornatylǵan «Para alma, para berme» sybaılas jemqorlyqqa qarsy eskertpeler sybaılas jemqorlyqtyń aldyn alý jáne memlekettik qyzmetshiler arasynda sybaılas jemqorlyqqa qarsy mádenıetti qalyptastyrý boıynsha taǵy bir shara bolady.

«Biz memlekettik qyzmet boryshyn ótep júrgen árbir adam óz jumys kúnin bastamas buryn, kompıýterdi qosqan ýaqytta sybaılas jemqorlyqtyń aldyn alý boıynsha habarlamany kórgenin jáne árdaıym parasatty, satylmaıtyn jáne adal qyzmetshi bolý kerektigin esine túsirgimiz keledi», - deıdi departamenttiń aldyn alý jáne parasat basqarmasynyń basshysy Baqytjan Ámirhanov.

Qalalyq ákimdikte qabyldanǵan osyndaı tájirıbeni aldaǵy ýaqytta óńirdiń barlyq memlekettik organdaryna engizý josparlanyp otyr. Aıta ketý kerek, 20-sekýndtyq qalqymaly eskertý ákimdik qyzmetkerleriniń ǵana emes, Kókshetaý qalasy ákiminiń de kompıýterine ornatylǵan.