Aqmolada mas júrgizýshilerdiń kinásinen úsh adam kóz jumyp, 36 adam jaraqat aldy

KÓKShETAÝ. QazAqparat – Bıyl Aqmola oblysynda jol-kólik oqıǵasynyń sany 3,5 esege artty. Sonyń saldarynan bes bala kóz jumyp, 117 adam jaraqat aldy. Onyń ishinde 25 jaǵdaıda jol apaty mas júrgizýshilerdiń kinásinen bolǵan, dep habarlaıdy QazAqparat tilshisi.

Oblystyq PD baspasóz qyzmetiniń málimetinshe, jyl basynan beri óńirde jol qozǵalysy erejelerin buzǵany úshin 134 myń quqyq buzýshy ákimshilik jaýapkershilikke tartylǵan.

«Bıylǵy jyly Aqmola oblysynda jol-kólik oqıǵasynyń sany 3,5 esege artty. Sonyń saldarynan bes bala kóz jumyp, 117 adam jaraqat aldy. Keıbir júrgizýshilerdiń jaýapsyzdyǵy men jol qozǵalysy erejelerin saqtamaýy jol apattaryna ákelip soǵyp otyr. Sonymen birge, bıyl Aqmola oblysynda mas kúıinde kólik júrgizý deregi byltyrǵy jylmen salystyrǵanda 2,5 esege artqany baıqalyp otyr. Jyl basynan beri mas júrgizýshilerdiń kinásinen 25 apat oryn alyp, úsh adam kóz jumdy jáne 36 adam jaraqat aldy», - deıdi Jergilikti polıtsııa qyzmeti basqarmasynyń basshysy, polkovnık Aslan Qyzbıkenov.

Sonymen birge, basqarma basshysy atap ótkendeı, mas kúıde kólik aıdaǵan 31 aqmolalyq júrgizýshi kolonııalarda tıisti jazasyn óteýde. Budan bólek, júrgizý quqyǵynsyz kólikti basqarǵany úshin 2 myń 91 júrgizýshi ákimshilik jaýapqa tartylǵan. Onyń ishinde buryn kólik quraldaryn basqarý quqyǵynan aıyrylǵan 368 adam bar.

Aıta ketsek, budan buryn Aqmola oblysynda mototsıkl mingen áıel men er adam jol apatynan kóz jumǵan edi.