Aqmolada qazaq tilindegi úzdik shyǵarmalar onlaın baıqaýy máresine jetti

KÓKShETAÝ. QazAqparat - Qazaqstan Respýblıkasy Táýelsizdiginiń 30 jyldyǵynyń qarsańynda Aqmola oblysynyń jergilikti qalamgerleri arasynda balalarǵa arnalǵan qazaq tilindegi úzdik shyǵarmalar oblystyq onlaın baıqaýy ótti, dep habarlaıdy QazAqparat tilshisi.

Baıqaýdyń maqsaty - til mádenıetin kóterý, kórkem ádebıetti, sonyń arasynda jergilikti aqyn, jazýshy eńbekterin nasıhattaýdy jandandyrý, balalarǵa arnalǵan qazaq tilindegi ádebı shyǵarmalardy kóbeıtý.

Bıyl baıqaýǵa 28 úmitker qatysty. Baıqaýǵa qatysýshylardy baǵalaý kezinde shyǵarma tiliniń kórkemdigi, ulttyq qundylyqtardy nasıhattaýy, tartymdylyǵy men mazmundylyǵy eskerildi.

Baıqaý poezııalyq jáne prozalyq shyǵarma atalymdary boıynsha ótti.

Qazylar alqasynyń sheshimi boıynsha poezııalyq shyǵarmalardan 1-oryndy Saılaý Jylqybaev, 2-oryndy Oralbek Núrúsh, 3-oryndy Qaıyrbaı Tóreǵoja ıelendi.

Prozalyq shyǵarmalar boıynsha 1-oryndy Serik Jetpisqalıev, 2-oryndy Nurǵaıyp Havsemet, 3-oryndy Qarataı Tólekeev ıelendi.

Qalǵan baıqaý qatysýshylar yntalandyrý syılyqtaryn ıelenetin boldy.

«Bıyl Qazaqstan Prezıdenti Qasym-Jomart Toqaevtyń «Táýelsizdik bárinen qymbat» atty maqalasy jaryq kórip, maqalada balalar ádebıetine erekshe mán bergenin bárimiz jaqsy bilemiz. Osy oraıda Mádenıet jáne sport mınıstrligi 2021 jyldy «Balalar ádebıeti» jyly dep jarııalady. Aqmola oblysy ishki saıasat basqarmasynyń uıymdastyrýymen ótkizilgen baıqaýǵa oblys qalamgerleri shyǵarmashylyqpen kelip, balalarǵa arnalǵan qazaq tilindegi ádebı shyǵarmalardy kóbeıtýge óz úlesin qosty»,- deıdi qazylar alqasynyń tóraǵasy Ǵosman Tóleǵul.

Oblystyq baıqaýdyń júldegerleri dıplom, alǵys hat jáne baǵaly syılyqtarmen marapattalady.