Aqmolada qaıta tergeý úshin sarbazdyń denesi qazyp alyndy
Aqmola oblysynyń 20 jastaǵy týmasy Jeńis Ahmetjannyń Otan aldyndaǵy boryshyn ótep, úıine oralýyna eki apta ýaqyt qalǵan edi. Týystarynyń aıtýynsha, jigit ásker qataryna shaqyrylyp, ár qalaǵa bólgen kezde Qaraǵandy oblysyna túsken. Aldymen Maıqudyqta boldy. Jarty jyldan soń ofıtserlermen arada kıkiljiń týyp, sarbazdy Prıozersk garnızonyndaǵy áskerı bólimge aýdardy. Sarbazdyń anasy Gúldana Ahmetjanovanyń aıtýynsha, balasy ólerinen birer saǵat buryn ǵana beıneqońyraý shalǵan. Óziniń kúzette turǵanyn aıtqan.
— Ol sol kúni keshkilik beıneqońaraý shalyp, az kún qalǵanyn, 14 kúnnen soń úıge oralatynyn aıtty. Men «Ulym, bári jaqsy bolady! Jaqyn kúnderi kezdesemiz!» dep jigerlendirdim. Sol kúni túnde maǵan telefon qońyraý túsip, qaıǵyly jaǵdaı bolǵanyn aıtty, — dep sózine jas aldy anasy.
Qaıǵydan qan jutqan anasy Astanaǵa baryp, keıin áskerı ushaqpen Balqashqa jetti. Máıithanada ulynyń denesin kórip, qantalaǵan, jyryp ketken jerlerin ańǵardy. Onyń aıtýynsha, ulynyń jańa áskerı kıimi joǵalyp ketken. Sol túni áskerı bólimde beınebaqylaý kamerasy da isten shyqqan. Keıin týǵan-týystary áleýmettik jeli arqyly sarbaz ólimine otbasylyq-turmystyq janjal sebep dep kórsetilgenin oqyǵan.
Gúldana Ahmetjanova jalǵyz ulynan ári asyraýshysynan aıyrylyp otyr.
Jigittiń jaqyn aǵasy Dáýlet Qasenov uzaq jyl tergeýshi bolǵan. Ol istiń kúmándi tusyn birden ańǵarǵan.
— Ol bir bólimnen ekinshi bólimge aýystyryldy. Buıryq boıynsha ondaı kezde qarý ustaıtyn júktemelerge jiberilmeýi tıis. Ol rota ishinde bolýy kerek edi. Biraq ony kúzetke qoıǵan. Sonymen birge denesinde jaraqat izderi bar. Sarapshylary ol týraly aıtty. Biraq onymen birge qyzmet etken áskerı qyzmetkerlerden jaýap alynbady. Demek bólimde kıkiljiń bolǵan, ony urǵan. Denesindegi qantalaý izderi sony bildiredi. Atý jaıy da kúmándi. Adam óz-ózin atqan kezde oqta qan izderi bolýy tıis. Qan aǵyp, mı shashylyp qalýy kerek. Al bul jerde qabyrǵa taza. Oq tabylǵan jeri de durys emes. Aıaq kıimi men shalbary qan. Biraq ol shyntaqtap jatyr. Qan sonda aıaq kıimi men shalbaryna qalaı tııýi múmkin? Meni oıymsha ony óltirgen, keıin sýıtsıd dep aıtyp tur. Ol ózin-ózi ata almaıdy, — dedi Dáýlet Qasenov.
Saraptama qorytyndysyna súıensek, sarbaz mas bolǵan. Týysynyń aıtýynsha, Jeńis áskerı boryshyn ótep júrip qaıta-qaıta aqsha suraǵan. Qaıǵyly oqıǵa bolǵan túni de dál solaı bolǵan.
Týǵan-týystary saraptamany qaıta ótkizýdi talap etti. Oqıǵa ornyna kelgen áskerı polıtsııa ókilderi QR QPK 201 babyna súıenip qandaı da bir pikir bildirýden bas tartty. Sot aldy tergeý kezinde aqparat taratpaıtyndaryn aıtty.
Ekinshi qaıtara jasalǵan saraptama daýly istiń aq-qarasyn anyqtaýǵa múmkindik bere me? Kazinform QR Qurlyq áskeriniń baspasóz qyzmetine resmı suranys jiberdi.
Aıtyp óteıik, ótken jyly qazanda baspasóz qyzmeti Prıozersk garnızonynda sarbazdyń ózin-ózi atqany týraly aqparat taratty. Ol kezde sarbaz ólimine áskerı qyzmettiń esh qatysy joq ekeni aıtyldy. Sonymen birge otbasylyq-turmystyq janjal degen tujyrym jasaldy.