Aqmolada kásipkerlerge jarty jyl boıy qoqys shyǵarǵany úshin negizsiz aqy eseptelgen
Sybaılas jemqorlyqqa qarsy qyzmet departamenti baspasóz qyzmetiniń málimetinshe, ótken jyldyń qyrkúıeginde qalanyń kommýnaldyq kásiporny qatty turmystyq qaldyqtardy jınaý jáne áketý boıynsha qyzmetter kórsetýge arnalǵan jarııa shartty jasap, ony baspa basylymyna jarııalady.
Osy qujatqa sáıkes 40-tan astam kásipker kórsetilgen shart boıynsha qyzmet aqysyn tóleýge mindetteldi.
Alaıda, Ekologııalyq kodekstiń 367-babyna sáıkes turǵyn úıde nemese jeke ǵımaratta qyzmetin júzege asyratyn zańdy tulǵalarmen jáne JK-men jarııa emes, jeke shart jasalady.
«Jarııa shart turǵyn úıde turatyn jeke tulǵalarǵa ǵana qoldanylady. Óz kezeginde, qoqys shyǵaratyn kompanııa jarııa sharttyń talaptaryna silteme jasaı otyryp, kásipkerlerden somany negizsiz óndirip aldy jáne jaǵdaıdy retteý úshin tıisti sharalar qabyldamady», - dedi vedomstvodan.
Osy rette, Atbasar aýdanynda qoqys shyǵarý úshin tólem oblystaǵy eń joǵary tólemderdiń biri bolyp otyr.
Departamenttiń bastamasy boıynsha bul másele oblys ákiminiń tóraǵalyǵymen sybaılas jemqorlyqqa qarsy is-qımyl máseleleri jónindegi komıssııada qaraldy.
«Óńirdiń jemqorlyqqa qarsy qyzmeti, prokýratýra, «Atameken» ÓKP jáne Atbasar aýdany ákimdiginiń birlesken jumysy sheńberinde bıznes sýbektileri úshin qatty turmystyq qaldyqtardy áketý týraly jarııa sharttyń talaptary sot tártibimen jaramsyz dep tanyldy. Endi Atbasar kásipkerleri óz múddesin eskere otyryp jáne taraptardyń ózara jaýapkershiligi shartynda qoqys shyǵarýǵa jeke shart jasaı alady», - dep tolyqtyrdy vedomstvodan.
Aıta ketsek, budan buryn Kókshetaýda kásipkerden aqsha talap etken tótenshe jaǵdaı qyzmetkerleri sottalǵanyn jazǵan edik.