Aqmolada karantındik fıtosanıtarııalyq baqylaý aktilerine QR-kod engizildi
Aqmola oblysy boıynsha Memlekettik qyzmet isteri jáne sybaılas jemqorlyqqa qarsy is-qımyl departamenti baspasóz qyzmetiniń málimetinshe, memlekettik organdar qyzmetiniń ashyqtyǵyn qamtamasyz etý maqsatynda agroónerkásip kesheninde syrttan jetkiziletin ónimge qaıtalama tekserý júrgizilgeni úshin Kókshetaý qalalyq aımaqtyq ınspektsııasymen beriletin karantındik fıtosanıtarııalyq baqylaý men qadaǵalaý aktilerine arnaıy QR-kod engizilip otyr.
Atalǵan tártip turmystyq jemqorlyqty joıýǵa múmkindik beredi. Sebebi QR-kod arqyly ónimdi kimniń jáne qashan teksergeni týraly aqparatty alýǵa bolady. Ol úshin QR-kodty skanerleý baǵdarlamasyn telefonǵa júkteý jetkilikti.
Qaıtalama tekserý ósimdik ónimderine júrgiziletini belgili. Onyń ishinde dándi, maıly, jemshóptik daqyldar, sonymen qatar aǵash tuǵyryqtary (paddon) men júk tasýǵa arnalǵan ydystar (pollet) bar.
Qyzmet alýshynyń ótinish bildirýi arqyly memlekettik ınspektor júktiń jetkizilgen ornyna tekserý maqsatynda baryp, karantınge jatqyzylǵan ónimdi vızýaldyq baqylaýdan soń qaıtalama tekserý aktisin beredi.
«Endi QR-kodtyń kómegimen júrgizilgen qaıtalama tekserý jóninde tolyq málimet alýǵa bolady. Onyń ishinde tekserý júrgizgen ınspektordyń aty-jóni, tekserýdiń kúni men ýaqyty, sonymen qatar senim telefony kórsetiledi. Bul quzyrly memlekettik organdardyń ashyqtyǵyn qamtamasyz etip, atalǵan saladaǵy turmystyq jemqorlyqty azaıtýǵa jol ashady» - deıdi departament basshysy Bergen Bespalınov.
Eýrazııalyq ekonomıkalyq odaǵynyń kedendik aýmaǵyna ákelinetin ónimder (karantınge jatqyzylǵan ónimder tizimine engizilgen) karantındik fıtosanıtarııalyq baqylaýǵa (qadaǵalaýǵa) jatqyzylady. Atalǵan tártip karantınge jatqyzylǵan ónimniń memlekettik fıtosanıtarlyq talaptaryna sáıkestiligin tekserý maqsatynda júzege asyrylady.