Aqmolada ınvestor men aýyl turǵyndary arasyndaǵy daý: Ákim túsinik berdi

KÓKShETAÝ. QazAqparat - Aqmola oblysy Jaqsy aýdanynyń ákimi Baýyrjan Malǵajdarov óńirlik kommýnıkatsııalar qyzmetinde aýdannyń bıylǵy on aıdaǵy áleýmettik - ekonomıkalyq damý nátıjesi jóninde brıfıng ótkizdi. Brıfıngte aýdan ákimi Esil aýylynda ınvestor men aýyl turǵyndarynyń arasyndaǵy daý týraly túsinik berdi, dep habarlaıdy QazAqparat tilshisi.

«Ózderińiz biletindeı, Esil aýylynyń turǵyndary «Imran-Agro» JShS ınvestorynyń máselesin kótergen bolatyn. Aýdan ákimdigi aýyl turǵyndarymen qyrkúıek aıynda 9 kezdesý ótkizdi, sondaı-aq, qazan aıynda úsh ret azamattardy qabyldady. Ár kezdesýde turǵyndarǵa («Albı-Agro» holdıngine kiretin «Ishım-Astyq» JShS burynǵy úleskerleri) «Ishım-Astyq» JShS «Tsesna bank» AQ nesıe alǵany jáne ony ýaqytyly tóleı almaı, ornyna kepilde turǵan jyljymaıtyn múlik, aýyl sharýashylyǵy tehnıkasy, aýyl sharýashylyǵy jerleri alynǵandyǵy túsindirildi», - dedi Baýyrjan Malǵajdarov.

Aýdan ákimi atap ótkendeı, atalmysh múlikterdi «Problemalyq nesıeler qory» AQ berý kezinde JShS úleskerleri jer paıynan aıyrylǵan.

Іri agroholdıngterdi saýyqtyrýdyń qarjylyq baǵdarlamasy sheńberinde 2019 jyldyń naýryzynda «Ishım Astyq» JShS, «Imran-Agro» JShS men «Problemalyq nesıeler qory» AQ arasynda jasalǵan birlesken sharýashalyq qyzmeti konsortsıaldy kelisimsharty negizinde atalmysh sharýashylyqqa «Imran-Agro» JShS keldi.

«Bıznestiń áleýmettik jaýapkershiligi sheńberinde aýyldyń áleýmettik ómirine qatysý úshin aýyl ákimdigi men ınvestor arasynda memorandýmǵa qol qoıyldy. Osy memorandýmǵa sáıkes JShS naýbaıhananyń úzdiksiz jumys isteýin, sý tasymaldaýdy, óz quqyǵynan aıyrylǵan burynǵy úleskerlerdi mal azyǵymen qamtamasyz etý, qart adamdarǵa kómektesý mindeti sııaqty ózge de áleýmettik máselelerdi óz moıyndaryna aldy. Atalmysh memorandým birinshi kezekte turǵyndardyń múddesin qorǵaıtyn bolady», - dep tolyqtyrdy Baýyrjan Malǵajdarov.

Degenmen, aýdan ákimi túsindirgendeı, keıbir turǵyndar muny túsingileri kelmeıdi, jańa ınvestorǵa usynystaryn aıtpaıdy, jasalyp jatqan ıgi isterdi az kóretin kórinedi.

Eske sala keteıik, jaqynda Jaqsy aýdanynyń Esil aýylyndaǵy «Imran-Agro» JShS tıesli i 200 tonna shóp órtengen bolatyn. Osyǵan baılanysty polıtsııa Qylmystyq kodekstiń 202-babynyń 2-bóligi 5-tarmaǵy boıynsha qylmystyq is qozǵaǵan edi.