Aqmolada «Dıplommen aýylǵa» baǵdarlamasy sátti júzege asyrylyp jatyr

KÓKShETAÝ. QazAqparat - Aýyldyq jerlerde kadr tapshylyǵy máselesi ózekti bolyp otyr. Maman tapshylyǵyn máselesin sheshetin memlekettik baǵdarlamalardyń biri – «Dıplommen aýylǵa», dep habarlaıdy QazAqparat tilshisi Aqmola oblysynyń ishki saıasat basqarmasyna silteme jasap.

Bul ásirese kásibı qyzmettiń basynda qoldaý qajet joǵary oqý oryndary men kolledj túlekteri úshin óte mańyzdy.

Bul baǵdarlamany densaýlyq saqtaý, bilim berý, áleýmettik qamsyzdandyrý, mádenıet, sport jáne agroónerkásiptik keshen salasyndaǵy jas mamandar paıdalana alady.

Oblystyń ekonomıka jáne bıýdjettik josparlaý basqarmasynyń málimetinshe, aýylda muǵalimder men dárigerler burynǵysynsha suranysqa ıe mamandar bolyp qala beredi.

«Bıýdjette 616 mamanǵa kóterme járdemaqy jáne 339 nesıege qarajat qarastyrylǵan. 1 sáýirge deıin 87 mamanǵa kóterme járdemaqy tólendi», - dep atap ótti oblystyq ekonomıka jáne bıýdjettik josparlaý basqarmasy basshysynyń orynbasary Farıza Baımanova.

Aýyldaǵy jas mamandardy áleýmettik qoldaý sharalaryn alýshylardyń biri Araı Bulhaıdarova boldy.

Ol «Juldyz» balabaqshasynda 5 jyl boıy tárbıeshi bolyp jumys isteıdi.

Memleket áleýmettik qoldaýdan bólek, jumys jáne aýdan ortalyǵynda úı alý úshin bıýdjettik nesıe berdi.

«Men bul baǵdarlama týraly burynnan biletinmin jáne berilgen múmkindikti paıdalanýdy sheshtim. Bizdiń jastarǵa oǵan qatysýǵa keńes bergim keledi. Bul jas mamandar úshin tamasha bastama. Dekretke shyqqan kezde meni baspanasyz qaldyrmady», - deıdi jas qyzmetker.

«Dıplommen aýylǵa» jobasy iske asyryla bastaǵannan beri turǵyn úı satyp alýǵa beriletin bıýdjettik nesıelerdiń mólsheri eki jarym esege jýyq ulǵaıdy.

Bir jolǵy kóterme járdemaqynyń mólsheri de ósti. Jobaǵa qatysa alatyn mamandyqtar tizbesine de túzetýler engizildi.

Ótken jyldyń qazan aıynan bastap memlekettik qyzmetkerler de baǵdarlamany paıdalanýǵa múmkindik aldy.

Eske sala ketsek, «Dıplommen aýylǵa» baǵdarlamasy QR Tuńǵysh Prezıdentiniń bastamasymen 2009 jyldan bastap júzege asyrylyp keledi.

Onyń mindeti - kadrlardy damytý, aýyldyq eldi mekenderge bilikti mamandardy tartý arqyly qyzmet kórsetý deńgeıin arttyrý.

Áleýmettik qoldaý alý úshin aýylda keminde úsh jyl jumys isteý kerek.