Aqmolada bilim bólimi 5 mln teńgeniń oqý kabınetin 26 mln teńgeden satyp almaq bolǵan

KÓKShETAÝ. QazAqparat - Aqmola oblysynda memlekettik organ oqý kabınetin kóterińki baǵamen satyp almaqshy bolǵan, dep habarlaıdy QazAqparat tilshisi vedomstvonyń baspasóz qyzmetine silteme jasap.

Bul týraly Aqmola oblysy boıynsha sybaılas jemqorlyqqa qarsy is-qımyl departamenti mamandarynyń «Satyp alýdyń biryńǵaı terezesi» veb-portaly (eoz.kz) arqyly memlekettik satyp alý júıesine júrgizgen monıtorıng barysynda anyqtaldy.

Vedomstvonyń málimetinshe, bul servıs memlekettik organdar men kvazımemlekettik qurylymdardyń satyp alýlarynyń ashyqtyǵy men aıqyndyǵyn arttyryp qana qoımaı, satyp alýdy josparlaý satysynda sybaılas jemqorlyq táýekelderin onlaın rejımde anyqtaýǵa múmkindik beredi.

«Sybaılas jemqorlyq kórinisterine yqpal etetin negizgi faktorlardyń qataryna baǵany kóterýdiń júıeliligi jatady, bul tapsyrys berýshiniń bıýdjetin jasandy ulǵaıtýdy jáne bıýdjet qarajatyn tıimsiz jumsaýdy bildiredi. Sybaılas jemqorlyqqa qarsy qyzmet uıymnyń satyp alýǵa josparlanǵan taýarlardyń, jumystardyń nemese kórsetiletin qyzmetterdiń baǵasyn (ortasha naryqtyq qunmen salystyrǵanda) kóterý faktisin anyqtaǵan kezde mundaı jaǵdaılardy boldyrmaý maqsatynda bıýdjettik baǵdarlamalar ákimshilerine jedel túrde tıisti den qoıý hattary jiberiledi. Óz kezeginde tapsyrys berýshiler memlekettik satyp alý josparyn qaıta qaraıdy jáne túzetedi, ne satyp alýdyń kúshin joıady», - dedi vedomstvodan.

Jalpy, departamenttiń der kezinde áreket etýiniń arqasynda 2021 jyldyń qorytyndysy boıynsha 1,1 mıllıard teńgeden astam, al aǵymdaǵy jyldyń basynan beri 420 mıllıon teńgeden astam qarjy únemdelipti.

«Máselen, «Baldáýren» respýblıkalyq oqý-saýyqtyrý ortalyǵy bastapqyda 67,4 mln teńge nemese sharshy metrine 22,3 myń teńge somasyna keramogranıt plıtkasyn satyp alýdy josparlaǵan, al bir plıtkanyń naryqtaǵy ortasha baǵasy - sharshy metrine 2500-10000 teńge sheginde ózgeredi. Departamenttiń aralasýynan keıin 38,5 mıllıon teńge únemdeldi. Sondaı-aq, Zerendi aýdanynyń bilim bólimi jalpy somasy 267,8 mln teńgege nemese birligi úshin 26,7 mln teńgege 10 oqý kabınetin satyp alýdy kózdegen. Osyǵan uqsas taýarlardy Kókshetaý qalasynyń bilim mekemeleri orta eseppen 5-ten 10 mıllıon teńgege deıin satyp almaqshy bolǵan. Departamenttiń usynymdary engizilgennen keıin 241 mıllıon teńge únemdeldi», - dep tolyqtyrdy vedomstvodan.

Osy rette óńirdiń sybaılas jemqorlyqqa qarsy qyzmeti aqmolalyqtardy bıýdjet qarajatynyń jumsalýyn qoǵamdyq baqylaý sheńberinde belsendi azamattyq ustanym tanytýǵa shaqyrady.