Aqmolada balalar qozǵalysyna 84 myńnan astam jasóspirim tartyldy
Aqmola oblysy bilim basqarmasynyń bas mamany Marına Lıdiń aıtýynsha, atalmysh joba jastar men balalardy tárbıeleý jáne rýhanı jańǵyrtýǵa baǵyttalǵan. «Biz - seniń balalaryńbyz, Qazaqstan! Biz jańa álemde ómir súremiz!» jobasy - sarapshylardyń pikiri boıynsha TMD-daǵy eń úzdik baǵdarlamalyq joba.
Búgingi kúni Qazaqstan balalardyń qoǵamdyq qozǵalysy boıynsha kósh bastap tur. Sondyqtan elimizdiń tájirıbesine álemniń kóptegen elderi qyzyǵýshylyq tanytyp otyr.
«Jahandyq qaterli kezeńde ómir súrgen jas urpaq óziniń belsendiligi jáne sanalýandyǵymen erekshelenedi. Alǵa qoıǵan tapsyrmany jumylǵan judyryqtaı birlesip qana sheshýge bolady. Naqty osy jerde jastar men balalar uıymdarynyń jáne birlestikteriniń róli mańyzdy. Osylar arqyly balalar ózderiniń kóshbasshylyq, uıymdastyrýshylyq qabiletterin arttyryp, ony úlken ómirge aıaq basqan kezde paıdalanatyn bolady», - deıdi Marına Lı.
Qazirgi kezde Aqmola oblysynda «Jas ulan», «Juldyz» uıymdary men «Adal urpaq», «Sanaly urpaq» tárizdi erikti mektep klýbtary jumys isteıdi. Jalpy, balalar qozǵalysyna barlyǵy 84 myńnan astam bala men jasóspirim tartyldy.
Onyń ishinde pedagogıka ǵylymdarynyń kandıdaty, dotsent Elena Dmıtrıenko jetekshilik etetin «Juldyz» balalar qoǵamdyq uıymy» respýblıkalyq odaǵy belsendi jumys istep jatyr. Sonymen qatar, Elena Aleksandrovna - QR Bilim berý isiniń úzdigi, «Qurmet» ordeniniń kavaleri, «Altyn patent» ıegeri. Uıym qolǵa alǵan «Juldyz» baǵdarlamasy ómirden óz ornyn tabýǵa umtylǵan, jarqyn ári qaıtalanbas tulǵa bolyp qalǵysy keletinderge baǵyttalǵan. Ózin-ózi tárbıeleý úshin ujymdyq jumystardy, balalarmen tárbıe jáne damytý jumystaryn josparlaǵan kezde qoldanylady. Baǵdarlamany ázirleý barysynda shetelderdegi balalar qozǵalysynyń tájirıbesi eskerildi.
«Juldyz» baǵdarlamasy kóp jyldan beri balalardy tárbıeleýdiń tıimdi quraly retinde Astana, Almaty, Qaraǵandy, Qostanaı, Óskemen, Aqmola, Pavlodar, Soltústik Qazaqstan oblystarynda jáne basqa da óńirlerde keńinen qoldanylyp keledi.
«Al, oblys aýmaǵynda ótkizilgen sharalarǵa keletin bolsaq, Býrabaı aýdanynda «Rýhanı jańǵyrý» baǵdarlamasynyń bir jyldyǵyna oraı, elimizdegi balalar qoǵamdyq qozǵalystarynyń birigýi «Biz - seniń balalaryńbyz, Qazaqstan! Biz jańa álemde ómir súremiz!» atty birinshi respýblıkalyq forým uıymdastyryldy. Forým jumysyna Qazaqstan men Reseıdiń balalar qoǵamdyq birlestikteriniń 180 kóshbasshysy qatysty. Bul elimizdegi balalar qoǵamdyq qozǵalystarynyń jumysyn shıratyp, balalardyń memleket jáne qoǵamdyq ómirge aralasýyna baǵyttalǵan áleýmettik bastamalaryn damytýǵa qoldaý kórsetýge múmkindik berdi. Budan bólek, Qazaqstan men Germanııanyń balalar qoǵamdyq qozǵalystarynyń qatysýymen «Rýhanı jańǵyrý: ashyq Qazaqstan» halyqaralyq sammıti ótkizildi. Sondaı-aq, balalar qoǵamdyq qozǵalystarynyń 500-den astam kóshbasshysy qatysqan 5 oblystyq is-shara uıymdastyryldy. Óńirdegi mektepter men kolledjerde kóshbasshylyq alańdy damytý boıynsha 42 «Rýhanı jańǵyrý» kabıneti ashylyp, jumys isteýde. Bul baǵyttaǵy jumystar Aqmola oblysynyń barlyq aýdandary men qalalarynda júzege asyrylyp jatyr», - dep túıindedi Marına Lı.