Aqmolada «Bala aqyn – jas daryn» oqýshylar aıtysynyń júldegerleri marapattaldy

KÓKShETAÝ. QazAqparat - Aqmola oblysynda aqyn, pýblıtsıst, pedagog-aǵartýshy, jańa qazaq ádebıetiniń negizin qalaýshylardyń biri – Maǵjan Jumabaevtyń 130 jyldyǵyna arnalǵan «Bala aqyn – jas daryn» oblystyq oqýshylar aıtysy ótti, dep habarlaıdy QazAqparat tilshisi.

Oblystyq halyq shyǵarmashylyq jáne mádenı demalys ortalyǵy Birjan sal aýdandyq mádenıet úıinde uıymdastyrǵan jyr dodasyna Arshaly, Birjan sal, Bulandy, Býrabaı, Egindikól, Ereımentaý, Jaqsy, Zerendi, Tselınograd aýdandary men Kókshetaý qalasynan kelgen 12-18 jas aralyǵyndaǵy 14 oqýshy qatysty.

«Óńirde jyl sanap aıtysqa qatysýshylar sany artyp keledi. Bul aıtysta aqynnyń shyǵarmashylyq murasyn dáripteýge, jastar arasynda qazaq ónerin nasıhattaýǵa, ulttyq biregeılikti saqtaýǵa baǵyttalǵan. Sonymen qatar, aıtysty halyq shyǵarmashylyǵy janry retinde damytý, óńirdiń jas talantty aqyndaryn anyqtaý», - dedi oblystyq halyq shyǵarmashylyq jáne mádenı demalys ortalyǵynyń basshysy Ashat Magavın.

Jas aqyndardyń saıysyna aqmolalyq aqyn, Qazaqstan Jazýshylar Odaǵynyń múshesi, «Mádenıet salasynyń úzdigi» tósbelgisiniń ıegeri, Aqmola oblystyq tarıhı-ólketaný mýzeıiniń dırektory Qudaıberli Myrzabek tórelik etti.

Aıtys qorytyndysy boıynsha bas júldeni bulandylyq Hyzyrbek Syrym jeńip alsa, birinshi oryndy ereımentaýlyq jas aqyn Ádiljan Bekarys ıelendi.

Al ekinshi orynǵa taǵy bir bulandylyq aqyn Elesh Nurǵısa laıyq dep tanylsa, júldeli úshinshi oryndy Erementaý aýdanynyń ókili Sáttibek Sárıgbolatuly men -Tselınograd aýdanynan kelgen aqyn Adal Kerbez ózara bólisti.

Aıtys jeńimpazdary men júldegerleri baǵaly syılyqtarmen jáne dıplomdarmen marapattaldy.