Aqmolada arheologııalyq zertteý kezinde sarmat dáýiriniń «qurbandyq tasy» tabyldy

NUR-SULTAN. QazAqparat – Aqmola oblysynyń aýmaǵynan sarmat dáýirine tıesili qurban shalýǵa arnalǵan tas tabyldy, dep habarlaıdy QazAqparat QR Ulttyq mýzeıine silteme jasap.

Ulttyq mýzeıdiń Facebook paraqshasynda jazylǵandaı, Aqmola oblysy ákimdiginiń qoldaýymen atalǵan óńirde rýhanı qundylyqtardy zertteýge arnalǵan joba iske asyp jatyr.

«Joba aıasynda Jarqaıyń aýdanynyń Shoıyndykól aýyly mańynan b.z.d II-III ǵ. jatatyn «qurbandyq tasy» tabyldy. Qurbandyq tasy dóńgelek pishindi, joǵarǵy jaǵy jalpaqtaý, al qyryna qoshqar múıizi órnektelip salynǵan. Ony kóshpelilerdiń dinı ǵuryptarynyń biri – «tazalaý» joralǵysyn oryndaýǵa qoldanǵan zat degen joramal bar», - dep jazylǵan ulttyq mýzeıdiń jelidegi paraqshasynda.

Sondaı-aq, habarlamada Qurban aıt qarsańynda tabylǵan jádigerdiń qundy ári mańyzdy ekeni aıtylǵan.

Eske salsak, buǵan deıin Aqmola oblysynda keıingi qola dáýiriniń jádigerleri – áshekeı buıymdar men qysh ydystardyń qaldyqtary tabylǵanyn habarlaǵan edik.

Vıdeodan alynǵan kadr