Aqmolada 60 myńǵa jýyq bıýdjet qyzmetkeriniń jalaqysy ósedi

KÓKShETAÝ. QazAqparat - Memleket basshysy N.Á.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty halqymyzǵa Joldaýyndaǵy mindetterdi túsindirý maqsatynda Aqmola oblysyna jumys saparymen kelgen QR Ádilet mınıstri Marat Beketaev A.Myrzahmetov atyndaǵy Kókshetaý ýnıversıtetinde bolyp, oqytýshy-professorlyq quramy jáne stýdenttermen kezdesti. Sharaǵa aımaq basshysy Málik Myrzalın de qatysty, dep habarlaıdy QazAqparat tilshisi.

Jıynda M.Myrzalın Elbasy Joldaýyn nasıhattaý men onda qoıylǵan mindetterdi halyqqa túsindirý boıynsha arnaıy toptar qurylǵanyn jáne olardyń belsendi jumys atqaryp jatqanyn atap ótti.

«Kópsalaly mindetterdi alǵa tartqan tarıhı qujattyń mańyzy erekshe. Otanymyzdyń ár azamaty bilimdi, belsendi, básekege qabiletti bolýy tıis. Sizderge qoıylatyn jaýapkershilik salmaqty, bul oraıda memleket tarapynan jaǵdaı da jasalýda. Ýaqyt talabyndaǵy bilim alyp, el úmitin aqtaý basty paryz. Biz jarqyn bolashaqqa Qazaqstan halqynyń dástúrli dostyq, baýyrmaldyq pen ózara túsinistik baıraǵyn jelbiretip jetemiz. Bul qasterli qaǵıdat sizderdiń qulaqtaryńyzda, júrek tórinde turýy kerek. Keler jyly «Jastar jyly» dep belgilenýi osyny meńzeıdi», - dedi Marat Beketaev óz sózinde. 

A.Myrzahmetov atyndaǵy Kókshetaý ýnıversıteti bul talaptardy óziniń basty ustanymy sanaıdy.

«Túlekterdiń 91 paıyzy jumyspen qamtylady. Oqý bitirip shyqqan stýdentterdiń jumysqa ornalasýyna bilim ordasy udaıy nazar aýdaryp otyrady», dedi bilim ordasynyń basshylyǵy.

Kezdesýde aıtylǵandaı Aqmola oblysynda bıýdjet salasynda jumys isteıtin 58 myń qyzmetkerdiń jalaqysy kóteriletin bolady. Osy maqsattarǵa 2019-2021 jyldarda respýblıkalyq bıýdjetten jyl saıyn 96 mıllıard teńge bólý josparlanǵan.