Aqmolada 19 myń gektar aýyl sharýashylyǵy jeri memleketke qaıtaryldy

KÓKShETAÝ. QazAqparat – Atbasar aýdanynda qadaǵalaý aktisi boıynsha 19 myń gektar aýyl sharýashylyǵy jeri qaıtaryldy, dep habarlaıdy QazAqparat tilshisi Aqmola oblystyq prokýratýrasynyń baspasóz qyzmetine silteme jasap.

«Memleket basshysynyń tapsyrmasy boıynsha aýdan prokýratýrasy paıdalanylmaıtyn aýyl sharýashylyǵy jerlerin qaıtarý boıynsha turaqty negizde jumys júrgizýde. Monıtorıng nátıjeleri qadaǵalaý aktilerimen aýdan ákiminiń nazaryna tıisti sharalar qabyldaý úshin joldanady. Aktilerdiń biri boıynsha júrgizilgen túsindirý jumystarynan keıin aýyl turǵyndarynyń qajettiligin qanaǵattandyrý boıynsha áleýmettik kómek kórsetý maqsatynda «Shortanbaı –2020» JShS erikti túrde «QazAgro» AQ-nan buryn satyp alynǵan 19 myń gektar paıdalanylmaǵan aýyl sharýashylyǵy jerin memleketke qaıtaryp berdi», – dedi Aqmola oblysy prokýratýrasy baspasóz qyzmetinen.

Vedomstvodan atap ótkendeı, qaıtarylǵan aýyl sharýashylyǵy jeri halyqtyń qajettiligi úshin qaıta bólinedi.

Aıta ketsek, Aqmola oblysynda qaraýsyz júrgen maldyń 3 myńnan astam ıesi jaýapqa tartyldy.