Aqmolada 154 myń stýdent pen oqýshy parasattylyq saǵatyna qatysty
Vedomstvonyń málimetinshe, QR Bilim jáne ǵylym mınıstrliginiń qoldaýymen QR Sybaılas jemqorlyqqa qarsy is-qımyl agenttiginiń bastamasymen óskeleń urpaqtyń boıynda adaldyq, ádildik, parasattylyq qaǵıdalaryn qalyptastyrý maqsatynda Bilim kúni elimizdiń barlyq oqý oryndarynda tuńǵysh ret jalpy respýblıkalyq «parasattylyq saǵaty» ótti.
«Shara Aqmola oblysynyń barlyq oqý oryndarynda, ıaǵnı, 557 mektep, 33 kolledj, 4 joǵary oqý ornynda ótti. Qatysýshylardyń jalpy sany 124 myń oqýshy men 30 myń stýdentti qurady.
Dáriskerler retinde memlekettik, quqyq qorǵaý jáne sot organdarynyń basshylary, «Aqmola – adaldyq alańy» jobalyq keńsesiniń, oblystyq jáne aýdandyq arnaıy monıtorıng toptardyń ókilderi, aýdan, qala ákimderi jáne olardyń orynbasarlary, qalalyq jáne aýdandyq máslıhattardyń hatshylary, «Nur Otan» partııasynyń ókilderi shaqyryldy», deıdi vedomstvodan.
QR Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń basshysy Murat Tóleýbaev Kókshetaý qalasynyń №2 orta mektep-lıtseıiniń oqýshylaryn jańa oqý jylymen quttyqtap, balalarǵa sybaılas jemqorlyqtyń teris saldary týraly baıandap, adal, ádil, meıirimdi jáne sypaıy bolýǵa shaqyrdy. Kezdesý qyzyqty áńgime túrinde ótip, onda balalar úıde, jumysta bolǵanda, jolda júrgende nemese kezekte turǵanda ózderin qalaı ustaý kerektigin talqylady.
«Parasatty azamat bolý - árbir qazaqstandyqtyń ómir súrý isine aınalýy tıis. Óz ózine, óz eńbegine jáne qorshaǵan ortaǵa adal jáne parasatty qarym-qatynaspen qaraý - elimizdiń jetistiginiń basty faktory» - dep atap ótti Murat Tóleýbaev.
Qoǵam qaıratkerleri osynaý úlken is-sharadan shet qalmady. Atap aıtqanda, «Aqmola – adaldyq alańy» jobalyq keńsesiniń basshysy Samıra Taıtenova men «Belyı blogger» QB tóraǵasy Erlaz Jaıyqbaev belsendi qatysty», deı kele, vedomstvonyń baspasóz qyzmetindegiler oqýshylar men stýdentter arasynda parasattylyqty qalyptastyrý jumystary oqý jylynyń sońyna deıin júrgiziletinin atap ótti.