Aqmola jáne Soltústik Qazaqstan oblystaryn gazdandyrý úshin 2 nusqa pysyqtalýda

KÓKShETAÝ. QazAqparat - Aqmola jáne Soltústik Qazaqstan oblystaryn gazdandyrý úshin 2 nusqa pysyqtalýda. Óńirlerdi gazben tolyq qamtamasyz etý úshin magıstraldyq gaz qubyryn salý qajet. Bul týraly Aqmola oblysynyń turǵyndarymen kezdesken QR Energetıka mınıstri Bolat Aqsholaqov málimet etti, dep habarlaıdy QazAqparat tilshisi.

«Aqmola jáne Soltústik Qazaqstan oblystaryn gazdandyrý boıynsha mınıstrlik 2 nusqany pysyqtaýda. Birinshisi, «Saryarqa» magıstraldyq gaz qubyryn jalǵastyrý. Magıstraldyq gaz qubyrynyń uzyndyǵy 298,1 km, boljamdy quny 182,1 mlrd teńgeni quraıdy», - dedi Bolat Aqsholaqov.

Mınıstr atap ótkendeı, jobany iske asyrý 143 eldi mekendi nemese 420 myń adamdy gazben qamtamasyz etýge múmkindik beredi. Qazirgi ýaqytta «Saryarqa» magıstraldyq gaz qubyrynyń qurylysy. ІІ-ІІІ kezeń. «Nur-Sultan – Kókshetaý – Petropavl» ýchaskesi» jobasynyń tehnıkalyq-ekonomıkalyq negizdemesin túzetý boıynsha jumystar aıaqtalyp, memlekettik saraptamanyń qorytyndysy alyndy. Sonymen birge, ekinshi nusqa retinde Reseı Federatsııasynan gazdandyrý máselesi qarastyrylýda.

«Bul nusqa Qazaqstan – Reseı jumys toby aıasynda QR jáne RF Energetıka mınıstrlikteri arasynda belsendi talqylanyp jatyr. Gazdy kommertsııalyq baǵamen satyp alǵan jaǵdaıda, Reseı tarapy eldiń soltústik jáne shyǵys óńirlerin gazdandyrý nusqalaryn qarastyrýǵa daıyn ekenin aıtýda. Osy eki nusqany jan-jaqty zerdelep baryp, eldiń soltústik óńirlerin gazdandyrýdyń túpkilikti nusqasyn ázirleý boıynsha sharalar qabyldanatyn bolady», - dep tolyqtyrdy Bolat Aqsholaqov.

Aıta ketsek, bıyl kúzgi jıyn-terin jumystaryna 423 myń tonna dızel otyny bólingen bolatyn.