Aqmola turǵyny úıinde kvarts kenin zańsyz óńdeýmen aınalysqan

STEPNOGOR. QazAqparat – Stepnogor qalasynyń Bestóbe kentinde 33 jastaǵy turǵynnyń úıinen kvarts kenin óńdeıtin shaǵyn tseh tabyldy, dep habarlaıdy QazAqparat tilshisi.

Aqmola oblystyq polıtsııa departamenti baspasóz qyzmetiniń málimetinshe, er adam tsehty ózi qurastyrǵan jáne quramynda altyny bar rýdany úıindilerden jınaǵan.

«Tergeý barysynda polıtsııa qyzmetkerleri er adamnyń úıinen úsh usatqysh pen eki jýǵysh ústel tapty. Bul derek Qylmystyq kodekstiń 295-1-babynyń 1-bóligi boıynsha sotqa deıingi tergeýdiń biryńǵaı tizilimine tirkeldi. Tergeý amaldary odan ári jalǵasyp jatyr. Jalpy, jyl basynan beri óńirde osy bap boıynsha 10 qylmystyq is tirkeldi», - dedi vedomstvodan.

Aıta ketsek, Aqmola oblysynda jer qoınaýyn zańsyz paıdalanǵan kásipker 2,5 jylǵa sottalǵan edi.