Aqmola turǵyny aıdaladan 6 mına men 5 granata taýyp aldy

KÓKShETAÝ. QazAqparat - Jarqaıyń aýdany Tasty-Taldy aýylynyń turǵyny jarylǵysh zattardy taýyp aldy, dep habarlaıdy QazAqparat polıtsııaǵa silteme jasap.

Aqmolalyqtyń aıtýynsha, qara metaldy jınaý kezinde arnaıy qurylǵynyń kómegimen shamamen 50 sm tereńdikten alyp shyqqan.

Sosyn birden polıtsııaǵa habarlaǵan. Jedel tergeý toby men saper mamandary dereý jolǵa shyqty.

Tabylǵan jarylǵysh zattar, atap aıtqanda, tankke qarsy 3 mına, jaıaý áskerge qarsy 6 mına jáne F-1 jáne rid-5 modeldi 5 granata tekserilip, olardyń oqý-jattyǵýǵa arnalǵany jáne ómirge qaýip tóndirmeıtini belgili boldy.

Sondaı-aq polıtsııa men saper brıgadasy jaqyn mańdaǵy aýmaqty tekserip, jarylǵysh zattarǵa uqsas zattar tappaǵan.

Atalǵan fakti sotqa deıingi tergep-tekserýlerdiń biryńǵaı tizilimine tirkeldi.

Saraptama taǵaıyndaldy, quqyq qorǵaý organdary bul zattardyń aıdalada qalaı paıda bolǵanyn anyqtap jatyr.