Aqmola oblysynyń úzdik pedagogy 800 myń teńge syıaqy aldy

KÓKShETAÝ. QazAqparat - Aqmola oblysynda «Úzdik pedagog» baıqaýynyń jeńimpazy 800 myń teńgeniń syıaqysyna ıe boldy, dep habarlaıdy QazAqparat tilshisi oblystyq bilim basqarmasynyń baspasóz qyzmetine silteme jasap.

Vedomstvonyń málimetinshe, pedagog kásibiniń mártebesin arttyrý jáne kásibı qyzmette joǵary jetistikteri bar shyǵarmashyl pedagogterge syıaqy berý maqsatynda Aqmola oblysynyń bastaýysh, negizgi jáne jalpy orta bilim berý uıymdarynyń pedagog qyzmetkerleri arasynda «Úzdik pedagog» syrttaı baıqaýynyń oblystyq kezeńi ótkizildi.

Shyǵarmashylyq saıysqa bastaýysh, negizgi jáne jalpy orta bilim berý uıymdarynyń 21 pedagogy qatysty.

Baıqaýǵa qatysý úshin pedagogter kelesi konkýrstyq materıaldardy usyndy: «Meniń júregimdegi mektep» beınerolık, beınesabaq, esse, portfolıo.

Baıqaý qorytyndysy boıynsha bastaýysh, negizgi jáne jalpy orta bilim berý uıymdarynyń pedagog qyzmetkerleri arasynda «Úzdik pedagog» ataǵy jáne 875 100 teńge aqshalaı syıaqy Jaqsy aýylyndaǵy №1 jalpy orta mekteptiń qazaq tili men ádebıeti pániniń muǵalimi Lázzat Qasqaevaǵa berildi.

«Mundaı baıqaýǵa alǵash ret qatysyp otyrmyn. Aldymen aýdandyq deńgeıde gran-prı jeńip aldym. Meniń jumystarym oblysqa jiberildi. Árıne, jeńis men úshin tosynsyı boldy! Óıtkeni, men aýdandyq mektepti tanystyrdym jáne baıqaýǵa oblystyń barlyq mektepteri, sonyń ishinde qalalyq mektepter qatysatynyn túsindim. Qýanyshymdy sózben aıtyp jetkizý múmkin emes!» - dedi jeńimpaz.

Jaqsy aýylyndaǵy №1 jalpy bilim beretin mektepte Lázzat Qasqaeva 2002 jyldan beri 19 jyldaı eńbek etip keledi. Dál sol kezde ol jubaıymen birge Soltústik óńirge Almatydan kóship kelgen. Qazir mektepte ol qazaq tilinen sabaq berip qana qoımaı, tárbıe isi jónindegi meńgerýshi bolyp jumys isteıdi.

Sonymen birge, baıqaýda 20 qatysýshy Aqmola oblysy bilim basqarmasy basshysynyń gramotalarymen marapattaldy.