Aqmola oblysynyń týrıstik aımaqtaryna kire beriste sanıtarlyq beketter ornatylady

KÓKShETAÝ. QazAqparat - Aqmola oblysynda «Ashyq» jobasynyń arqasynda Nur-Sultan, Qaraǵandy, Almaty qalalarynan kelgen «qyzyl» nemese «sary» mártebesi bar adamdardyń nysandarǵa kirýge áreketterin anyqtaý jumystary jalǵasýda. Ásirese, jazda aımaqtyń demalys oryndary týrıster úshin tartymdy. Sondyqtan, týrıstik aımaqtarǵa kire beriste sanıtarlyq beketter ornatylmaqshy. Bul týraly jýrnalıstermen brıfıng ótkizgen oblystyń bas memlekettik sanıtarlyq dárigeri Aınagúl Mýsına málim ettti, dep habarlaıdy QazAqparat tilshisi.

Onyń aıtýynsha, búgingi tańda «Ashyq» jobasy boıynsha oblysta 589 nysan jumys isteıdi, jobaǵa qatysýǵa barlyǵy 680 ótinim berildi. Bul rette QR-kodtar boıynsha eń kóp kelýshisi bar 16 uıym anyqtaldy. Sonymen birge, QR-kod boıynsha kelýshilerdiń sany nóldik 20 qatysýshy Ashyq jobasynan eki aptaǵa shyǵaryldy. Bul kelýshilerdi úsh kúnnen artyq teksermegen nysandar.

«Ashyq» qosymshasy boıynsha óńirde ózin-ózi oqshaýlaý rejımin buzýdyń 140 jaǵdaıy anyqtaldy, onyń ishinde «qyzyl» mártebesi bar 51 adam jáne «sary» mártebesi bar 89 adam.

«Qyzyl» mártebesi boıynsha bes tártip buzýshy ákimshilik jaýapkershilikke tartyldy. Árbir jeke tulǵaǵa 87 510 teńge kóleminde aıyppul salyndy. Qalǵan tártip buzýshylardyń úı karantıni merzimi áli aıaqtalǵan joq, oqshaýlaý aıaqtalǵannan keıin olarǵa ákimshilik yqpal etý sharalary qoldanylatyn bolady. Al elorda turǵyndaryna qatysty turǵylyqty jeri boıynsha sharalar qabyldaý úshin Nur-Sultan qalasynyń sanıtarlyq-epıdemıologııalyq baqylaý departamentine materıaldar jiberildi.

Aqmola oblysynda Nur-Sultan, Qaraǵandy, Almaty qalalarynyń «qyzyl» nemese «sary» mártebesi bar turǵyndary nysandarǵa ótýge tyrysqan jaǵdaılar anyqtalýda. Mundaı oqıǵalardyń eń kóp sany Kókshetaý men Býrabaı aýdanynda tirkelgen.

«Bizde týrıstik nysandar boıynsha qatańdatý bóliginde qaýlyǵa ózgerister engiziledi, sanıtarlyq beketter ornatylady jáne termometrııa men saýalnama ótkizý rejımi bolady. Sondaı-aq, «qyzyl» jáne «sary» mártebesi bar tulǵalar týrıstik aımaqtardyń aýmaǵyna kirmeýi úshin «Ashyq» jobasy boıynsha árbir kirýshiniń mártebesin tekserý josparlanýda», - dep atap ótti óńirdiń bas sanıtarlyq dárigeri.