Aqmola oblysynyń sheneýnikteri men AQSh azamaty 1,1 mlrd teńge jymqyrǵan –prokýratýra
Aqmola oblysy prokýratýrasynyń málimetinshe, tergeý barysynda Býrabaı jaǵalaýynda ornalasqan jer ýchaskesi bar jeke klınıkanyń jańa ǵımaraty men «Lexus» markaly avtokóliktiń zańsyz satyp alynǵany anyqtaldy.
«Qylmystyq isti tergeý aıasynda oblystyń arnaıy prokýrorlarynyń ótinishi boıynsha Aqmola oblystyq sotynyń qaýlysymen memleket paıdasyna AQSh azamatshasy «G.ıÝ.A.» múlki tárkilendi. «G.ıÝ.A.» klınıkalar jelisiniń ıesi bola tura, Densaýlyq saqtaý basqarmasynyń burynǵy basshylarymen bir topta memlekettik-jekeshelik áriptestik sharty sheńberinde eski medıtsınalyq jabdyqty jańa retinde jetkizip, 1 167 513 600 teńge somasyna bıýdjet qarajatyn jymqyrǵan degen kúdikke ilindi. Sonymen qatar medıtsınalyq jabdyqtardyń bir bóligi jumys istemeıtindigi anyqtaldy», – delingen oblystyq prokýratýra habarlamasynda.
Kúdiktiler osy aqshaǵa jańa emhana ǵımaratyn 890 mln teńgege salyp, ony memleketke 4,5 mlrd teńgege satýǵa tyrysqan. Munymen qosa «G.ıÝ.A.» 2021 jylǵy sáýirde qylmystyq is tirkelgenge deıin Qazaqstan shekarasynan shyǵyp ketken.
Osyǵan baılanysty oǵan kúzetpen ustaý bultartpaý sharasy syrttaı qoldanylyp, halyqaralyq izdeý jarııalandy.
«Aqmola oblystyq sotynyń 2023 jylǵy ekinshi maýsymdaǵy qaýlysymen (zańdy kúshine endi) memleket paıdasyna joǵaryda atalǵan múlik tárkilendi. Aqmola oblysy Densaýlyq saqtaý basqarmasynyń burynǵy basshylaryna qatysty negizgi qylmystyq is sotqa jetti. Al kúdiktiler qamaýǵa alyndy», – dedi oblystyq prokýratýradan.
Aıta keteıik, Aqmola oblysynyń arnaıy prokýrorlary respýblıka boıynsha alǵash ret halyqaralyq izdeýde júrgen adamnyń múlkin úkim shyǵarǵanǵa deıin sotqa deıingi tárkileý tetigin qoldandy.