Aqmola oblysynyń muǵalimi úzdik jas pedagog atandy

ASTANA. QazAqparat – «Jańa mektepke – jańashyl ustaz» atty jas pedagogterdiń VI respýblıkalyq baıqaýy aıaqtaldy. Oǵan elimizdiń barlyq óńirinen 57 pedagog qatysty, dep habarlaıdy QazAqparat Oqý-aǵartý mınıstrliginiń baspasóz qyzmetine silteme jasap.

Sońǵy kezeńniń qorytyndysy boıynsha bas júldeni Aqmola oblysynyń orys tili men ádebıeti pániniń muǵalimi Dámeli Ómirzaqova jeńip aldy. Birinshi oryndy Abaı oblysynan fızıka pániniń muǵalimi Jasqaırat Naýbetov, ekinshi oryndy Almaty qalasynan bıologııa pániniń muǵalimi Uldana Jaqsylyqova, úshinshi oryndy Batys Qazaqstan oblysynan Qazaqstan tarıhy pániniń muǵalimi Damır Kýnashev ıelendi.

«Baıqaýdyń alǵashqy kezeńinde qatysýshylar «Jańa mektepke – jańashyl muǵalim» taqyrybynda esse jazdy. Olar ózderiniń ómirlik, kásibı jáne jeke ustanymyn, jetekshi pedagogıkalyq ıdeıalaryn ashyp jazdy. Baıqaýǵa qatysýshylar úshin eń mańyzdy sát tanymaıtyn synypta sabaq ótkizý boldy. Konkýrstyq sabaqtyń taqyrybyn qatysýshy ózi tańdady. Baıqaýdyń sońǵy kezeńi – «Shyǵarmashylyq joldyń bastalýy» atty prezentatsııa. Baıqaýǵa qatysýshylar ózderi jáne mamandyqqa degen kózqarasy týraly aıtyp berdi. Aıta ketý kerek, árbir qatysýshynyń kásibı ımıdjin ashyp aıtýda, pedagogıkalyq ustanymyn tanystyrýda shyǵarmashylyq pen izdenis bar», - dedi «Baldáýren» respýblıkalyq oqý-saýyqtyrý ortalyǵynyń dırektory Serjan Alıbaev.

Almaty, Abaı, Qyzylorda, Qaraǵandy, Batys Qazaqstan jáne Qostanaı oblystarynyń pedagogteri «Daryndy ustaz», «Jigerli ustaz», «Shyǵarmashyl ustaz», «Tabıǵat bilgiri» sııaqty birqatar nomınatsııalarǵa ıe boldy.