Aqmola oblysynyń delegatsııasy Ózbekstanda boldy

KÓKShETAÝ. QazAqparat - Aqmola oblysynyń delegatsııasy Ózbekstanda bolyp, áriptestik týraly birqatar kelisimsharttarǵa qol qoıdy, dep habarlaıdy QazAqparat tilshisi ákimdiktiń baspasóz qyzmetine silteme jasap.

Qarashanyń 15 kúni Shymkent qalasynda ótken Qazaqstan men Ózbekstan arasyndaǵy yntymaqtastyq jónindegi forýmǵa Aqmola oblysynyń delegatsııasy men kásipkerleri qatysqan bolatyn. Forýmda Aqmola oblysynyń ákimi Málik Myrzalın men Ózbekstannyń Syrdarııa oblysy hokımi Gofýrjon Mırzaevpen ekjaqty áriptestik týraly kelisimshartqa qol qoıdy.

Vedomstvonyń málimeti boıynsha, forýmda Aqmola oblysynyń kásipkerler palatasy men Ózbekstannyń saýda-ónerkásip palatasy jáne Qazaqstannyń syrtqy saýda palatasy 2019 jyldyń qańtarynda Tashkentte Aqmola oblysynyń saýda úıi ashý týraly ýaǵdalasty.

 Joba aqmolalyq týara óndirýshilerdiń ónimderiniń satý geografııasyn keńeıtý, shetel naryǵyna shyǵý, eksport kólemin arttyryp, ınvestıtsııa tartýǵa baǵyttalǵan.

Aqmolalyq delegatsııanyń Syrdarııa oblysyna sapary kezinde Aqmola oblysynda naryq baǵasynan tómen ónimderdi satatyn ózbektiń saýda úıin ashý týraly ekijaq kelisimge keldi. Aqmola oblysynyń ákimi Málik Myrzalın sapary aıasynda erkin-ekonomıkalyq aımaq, ózbek kásiporyndary jáne eksporttyq baǵytta taýarlardy óndirý jumystarymen tanysty.

Qazirdiń ózinde ekijaqty birlesken joba bastaý aldy. Kókshetaýdaǵy «Novopek» JShS men «Syrdare» erkin-ekonomıkalyq aımaq arasynda quny 10 mıllıon AQSh dollary bolatyn karbonat kaltsııasy jáne polıetılen qaptaryn shyǵaratyn zaýyt salý týraly 2 kelisimshartqa qol qoıyldy.

Sonyen qatar, eki eldiń kásiporyndary arasynda Qazaqstanǵa medıtsınalyq shprıts, kókónis ónimderin, toqyma ónimderin jáne polıetılendi qaptar jetkizý boıynsha 20 mıllıonnan astam AQSh dollaryna 9 kelisimshart jasaldy.