Aqmola oblysynyń aýyldarynda ınternet baılanysynyń sapasy jaqsaryp keledi
Aqmola oblysynda 590 aýyl nemese barlyq eldi-mekenderdiń 81,5 paıyzy ınternetke qol jetkizip otyr. Al, 250-den astam turǵyny bar 350 aýyldyń 78 paıyzy ınternetke qosylǵan. Bıylǵy jyldyń jarty jyldyǵynda 25 aýyl ınternetke qol jetkizdi, jyl sońyna deıin taǵy 21 aýyldy ınternetke qosý josparlanǵan.
Sonymen birge, óńirde 250-den astam turǵyny bar 350 eldi-mekenniń turǵyndaryn sapaly mobıldi ınternetpen qamtamasyz etý boıynsha sharalar qolǵa alynýda. Bıylǵy jyly mobıldi opertorlar osyndaı 89 aýylda ornatylǵan stantsııany jańartýdy jáne jańasyn salýdy josparlap otyr.
«Shaǵyn jáne halyq sany az aýyldar men kentterde ınternet sapasynyń artýy úlken oqıǵa. Osy rette týrıstik áleýeti zor Zerendi aýdanyndaǵy Krasnyı kordon aýylynda alty jyl buryn ornatylǵan mobıldi stansa arqyly taratylatyn ınternettiń qyzmet sapasy tómen boldy. Búgingi kúni turǵyndar joǵary jyldamdyqty 4G ınternetke qol jetkizip otyr», - deıdi aýdan ákimdigindegiler.
Budan bólek, óńirde Bilim jáne ǵylymdy damytýdyń 2020-2025 jyldarǵa deıingi jáne «Tsıfrly Qazaqstan» memlekettik baǵdarlamalary sheńberinde bilim salasy júıesin tsıfrlandyrý boıynsha belsendi jumys júrgizilýde.
«Osynaý baǵdarlama sheńberinde óńirdegi jalpy bilim beretin 555 mektep 4-ten 8 Mbıt/sekýnd jáne odan joǵary jyldamdyqty keń jolaqty ınternet jelisine qosylǵan», - deıdi bilim basqarmasyndaǵylar.