Aqmola oblysynyń Arshaly aýdanynda tótenshe jaǵdaı jarııalandy

KÓKShETAÝ. QazAqparat – Aqmola oblysyna qarasty Arshaly kentindegi jylytý qazandyǵynan shyqqan apatqa baılanysty aýdanda jergilikti aýqymdaǵy tótenshe jaǵdaı jarııalandy. Bul týraly Ashyq NQA saıtynda jarııalanǵan Arshaly aýdany ákiminiń sheshiminde jazylǵan, dep habarlaıdy QazAqparat tilshisi.

«Tótenshe jaǵdaılardyń aldyn alý jáne joıý jónindegi aýdandyq komıssııanyń kezekten tys shuǵyl otyrysynyń 2022 jylǵy 10 qarashadaǵy № 10 hattamasy negizinde Arshaly aýdanynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn», - delingen sheshimde.

Aqmola oblysy ákimdiginiń aqparatyna saı, 9 qazanda Arshaly aýdany jaryqsyz qalǵan. Oǵan Astana qalasyndaǵy 2-shi jylý elektr ortalyǵynda tirkelgen apat sebep bolǵan.

«9 qarashada saǵat 4:00 shamasynda Astana qalasynyń 2-JEO-daǵy apatqa baılanysty Arshaly aýdany aýmaǵyndaǵy negizgi elektr jelisi toktan ajyratyldy. Rezervtik jelini qosqannan keıin Arshaly kentiniń qazandyqtarynyń ortalyq sorǵylary órtenip, isten shyqqany anyqtaldy.

9 qarashada saǵat 21:00-de Jibek joly aýyldyq okrýginde 6 tereńnen sý sorý qurylǵysynyń jumysy qalpyna keltirildi. Halyqqa sý berý 10 qarashada saǵat 5:00-de qalpyna keltirildi. 11 qarashada taǵy 2 tereńdik sorǵy qurylǵysy ornatyldy», - dep málimdedi quzyrly organnyń baspasóz qyzmetinen.

Ákimdiktiń dereginshe, Arshaly kentindegi sorǵy stantsııalarynyń jumysy 9 qarashada saǵat 12:00-de qalpyna keltirilgen. Al, turǵyn úılerge jylý saǵat shamamen 13:00-de berile bastaǵan.

Aıta keteıik, tótenshe jaǵdaı rejımi apattyń saldaryn joıý úshin engizilip otyr.