Aqmola oblysynyń ákimi praımerız qatysýshylaryn Alǵys hatpen marapattady

KÓKShETAÝ. QazAqparat – «Nur Otan» partııasy óńirlik fılıalynyń tóraǵasy, Aqmola oblysynyń ákimi Ermek Marjyqpaev praımerız qatysýshylaryn Alǵys hatpen marapattady, dep habarlaıdy QazAqparat tilshisi.

Qazaqstanda «Nur Otan» partııasynyń Tóraǵasy - Elbasy Nursultan Nazarbaevtyń bastamasymen qolǵa alynǵan birinshi jalpyulttyq praımerız óz máresine jetti.

Partııanyń oblystyq fılıalynyń baspasóz qyzmetinen málim etkendeı, Aqmola óńiri elimiz boıynsha joǵary nátıje kórsetti. Onyń ishinde partııa músheleriniń 34 myńǵa jýyǵy nemese 91,4 paıyzy óz úmitkerine daýys berdi. Bul olardyń partııa tarapynan qolǵa alynyp otyrǵan barlyq jasampaz isterge úles qosýǵa daıyn ekendikterin dáleldep otyr.

«Praımerız óńirde partııaishilik básekeniń joǵary ekenin kórsetti, oǵan 827 kandıdat qatysty. Epıdemıologııalyq jaǵdaıdyń qıyn ýaqytynda úmitkerler úgit-nasıhat jumystaryn oıdaǵydaı júrgizdi. Praımerız qatysýshylary problemalyq suraqtardy kóterip, usynystardy tyńdap, kópshilik debatqa qatysty», - dedi vedomstvodan.

Kókshetaýda E.Marjyqpaev aqmolalyqtarǵa senim jáne qoldaý bildirgeni úshin rızashylyǵyn aıtyp, óńirdiń damýy qyzyqtyrǵan praımerız qatysýshylaryn Alǵys hatpen marapattady.

Endi praımerız kóshbasshylaryn QR Parlamenti Májilisine jáne barlyq deńgeıdegi máslıhat saılaýyna qatysý boıynsha saılaýaldy naýqanda aýqymdy komandalyq jumys kútip tur.