Aqmola oblysynyń ákimi kópbalaly otbasylarǵa syılyq jasady

KÓKShETAÝ. QazAqparat - Halyqaralyq otbasy kúni Aqmola oblysynyń ákimi Ermek Marjyqpaev Kókshetaý qalasynda turatyn birqatar úlgili, kópbalaly otbasylardyń úıinde bolyp, merekemen quttyqtady, dep habarlaıdy QazAqparat tilshisi ákimdiktiń baspasóz qyzmetine silteme jasap.

Andreı men Olesıa Pırojkovtar tórt bala tárbıelep otyr. Úlken qyzdary Veronıka men Anjelıka kolledjde oqıdy, ortanshysy ıÝlııa - jetinshi synypta, al uly Denıstiń jas mektepke jetpegen.
Kezdesýde ataýly áleýmettik kómektiń jańa mólsheri qomaqty materıaldyq qoldaý bolǵany aıtyldy.
«Ataýly áleýmettik kómektiń somasy 10 esege artty. Qazirgi ýaqytta 117 myń teńge alamyz», - deıdi úı ıesi Andreı.
«Memleket tabysy az kóp balaly otbasylarǵa qamqorlyq jasap otyrǵanyna qýanyshtymyz. Men ýaqytsha jumys istemeımin, otaǵasy - JShS júrgizýshisi, onyń jalaqysy bárine jetpeıdi», - dedi onyń jubaıy.


Al, Ysqaqovtardyń shańyraǵyna barǵanynda Ermek Marjyqpaevty otaǵasy - Aqmola oblysyndaǵy jalǵyz balalar neırohırýrgi Nurjan Mendibaıuly qarsy aldy. Bul mamandyq ıesi kórshi Soltústik Qazaqstan jáne Qostanaı oblystaryndaǵy aýrýhanalarda tapshy kórinedi. Sol sebepti, Nurjan Ysqaqov bul óńirlerden kelgen naýqastarǵa da medıtsınalyq kómek kórsetip keledi.

«Nurjan Mendibaıuly Jaqsy aýdany Qıma aýylynyń týmasy. Eńbek jolyn Atbasar qalasynda bastaǵan. On jyl buryn jubaıy - bastaýysh synyp muǵalimi Mıra Januzaqqyzymen Kókshetaýǵa qonys aýdarǵan. Jan joldasy Mıra ekeýi tórt bala tárbıelep otyr. Úlken uly Dıdar men qyzy Inabat IT-mektep-lıtseıinde oqıdy, kishi uly Ańsar jáne tórt aılyq Aıanat ázirshe ýaqyttarynyń kópshiligin anasymen ótkizedi. Nurjan da, Mıra da kópbalaly otbasydan shyqqan. Sondyqtan olar qansha bala bolýy kerek dep eshqashan oılamaǵan. Onyń ústine Ysqaqovtarmen qazir Nurjannyń ata-anasy birge turyp nemerelerin baǵýǵa kómektesip jatyr, Meńdibaı Ysqaquly ómir boıy mal dárigeri bolyp istegen, al Maıra Myrzaǵalıqyzy ustazdyq etken», - deıdi ákimdiktiń baspasóz qyzmetindegiler.

Merekemen quttyqtaǵan aımaq basshysy Ermek Marjyqpaev Pırojkovtar men Ysqaqovtar otbasylaryna bir-bir et salatyn aǵash astaýdan syılady.
«Erekshe syılyq tartqym keldi, astaý (et tabaq) - qonaqjaılylyqtyń, yntymaqty otbasynyń belgisi. Dastarhandaryńyz árqashan da baı bolsyn»,- dedi óńir basshysy.