Aqmola oblysynyń ákimi kóktemgi sý tasqynynyń aldyn alýdy tapsyrdy

KÓKShETAÝ. QazAqparat – Aqmola oblysynyń ákimi Ermek Marjyqpaev tótenshe jaǵdaılardyń aldyn alý jáne oǵan jol bermeý jónindegi oblystyq komıssııanyń májilisin ótkizdi, dep habarlaıdy QazAqparat tilshisi ákimdiktiń baspasóz qyzmetine silteme jasap.

Jıynda Aqmola oblystyq TJD bastyǵy A.Sovetovtiń, Esil basseıni ınspektsııasynyń basshysy D.Bekmaǵambetovtiń, oblystyq jolaýshylar kóligi jáne avtomobıl joldary basqarmasynyń basshysy A.Janǵasqanovtyń, Tselınograd aýdanynyń ákimi M.Tátkeevtiń, Atbasar aýdany ákiminiń mindetin atqarýshy B.Qambatyrovtyń esepteri tyńdaldy.

TJD bastyǵynyń málimetinshe, óńirdegi qar men ylǵal qorynyń mólsheri ótken jyldyń sáıkes merzimimen jáne ortasha jyldyq normamen salystyrǵanda joǵary. Qar mólsheriniń kóbeıýi barlyq óńirde jáne aýdan ortalyǵynan shalǵaı eldi mekenderde sý tasqyny qaýpin týdyryp otyr

«Máselen, Arshaly, Bulandy, Býrabaı, Ereımentaý, Esil, Jaqsy, Zerendi, Qorǵaljyn, Tselınograd, Sandyqtaý, Shortandy aýdandary men Kókshetaý qalasynda da tótenshe jaǵdaılarǵa baılanysty rezervtik qarjy, janar-jaǵar maı, ınertti materıaldar, qum salatyn qaptar qarastyrylmaǵan»,–dedi A.Sovetov.

Aımaq basshysy Ermek Marjyqpaev qańtar jáne aqpan aılarynda jaýǵan qar mólsheriniń shamadan kóptigin eskerip, eskertý sharalaryn nyǵaıtyp, aldyn alý boıynsha jumys josparyn túzetýdi tapsyrdy. Oblys ákimi kóktemgi sý tasqynynyń aldyn alyp, qaýipsizdikti qamtamasyz etý qatań baqylaýda ekenin atap ótti.

«Barlyq ákimderge Aqmola oblystyq jolaýshylar kóligi jáne avtomobıl joldary basqarmasy, «QazAvtoJol» Aqmola oblystyq fılıaly, aqyly avtomobıl joldary dırektsııasy, «Qazaqstan temir joly» UK» AQ fılıalymen birlesip qoqys tazalaýdy, respýblıkalyq jáne jergilikti mańyzy bar avtokólik joldary men temirjol boıyndaǵy sý aǵyzý nysandaryn qardan tazartýdy, sondaı-aq, eldi mekenderdegi qardy tazartýdy, sý qoımalaryn daıyndaýdy, gıdrotehnıkalyq nysandardyń jaǵdaıyn baqylaýdy tapsyramyn», - dedi Ermek Marjyqpaev.

Sonymen qatar, aımaq basshysy naýryzdyń 10-na deıin apatty jáne nashar jaǵdaıdaǵy gıdrotehnıkalyq nysandardy tranzıttik rejımge kóshirýdi, olardyń mańynda ınjenerlik tehnıka táýlik boıy kezekshilik jasaýdy qamtamasyz etýdi, eki aptanyń ishinde janar-jaǵar maı, ınertti materıaldar, qum salatyn qaptyń qoryn jasaýdy tapsyrdy.