Aqmola oblysynyń ákimi Kókshetaý turǵyndarymen kezdesti

KÓKShETAÝ. QazAqparat - Aqmola oblysynyń ákimi Ermek Marjyqpaev oblys ortalyǵynyń turǵyndarymen kezdesti. Onda turǵyndar aımaq basshysyna áleýmettik, turǵyn úı, kommýnaldyq salalar jáne ınfraqurylymdy damytý boıynsha ózekti suraqtar qoıdy, dep habarlaıdy QazAqparat oblys ákiminiń baspasóz qyzmetine silteme jasap.

Oblys ákimi men ártúrli qurylymdyq bólimshelerdiń jaýapty tulǵalary árqaısysyn jeke tyńdap, qyzyqtyrǵan másele boıynsha keńes berdi.

Jergilikti turǵyndardyń kópshiligi tolyq jaýap aldy. Sondaı-aq, keıbireýler ótken kezdesýlerde kóterilgen máseleni jedel sheshkeni úshin alǵysyn jetkizdi.

«Elektr energııasy máselesi boldy, bári oıdaǵydaı oryndaldy. Bizdiń jaryqtandyrý óte jaqsy, syrtta jaryq. Atqarylǵan jumys úshin, tez áreket etkenińiz úshin rahmetimdi aıtýǵa keldim», - dedi Oralbek Ómirjanov.

Kókshetaýda aýtızmi bar balalardy qoldaý ortalyǵyn ashý týraly usynyspen zeınetker Mádı Aıtjanov júgindi. Turǵynnyń aıtýynsha, bul ortalyq tolyq kún jumys istegeni jón.

Ótinish ıesin tyńdaǵan óńir basshysy bilim, densaýlyq saqtaý, jumyspen qamtýdy úılestirý jáne áleýmettik baǵdarlamalar basqarmasynyń basshylaryna tıisti tapsyrma berdi.

Birden óteýsiz negizde úı-jaı máselesi sheshildi.

Turǵyn úımen qamtamasyz etý - qala turǵyndary jıi kóteretin problemanyń biri boldy. Árbir jaǵdaı turǵyn úı zańnamasy sheńberinde jeke qaraldy.

Saıajaı turǵyndary úshin ınfraqurylymdy jańǵyrtý jáne qalalyq avtobýs reısterin ulǵaıtý ózekti.

Osy máselemen olar oblys basshylyǵyna júgindi. Kókshetaý ákimdigine árbir túıtkildi keshendi túrde sheshý, jobalaý-smetalyq qujattamany ázirleý jáne basqa mindetter júkteldi.

Kezdesýdi qorytyndylaı kele Ermek Marjyqpaev qoıylǵan máselelerdi sheshýdiń halyq aldyndaǵy quqyqtyq mańyzy men jaýapkershiligin atap ótti.

«Búgin aıtylǵan árbir másele sheshilgenin qalaımyn. Bizdiń mindetimiz - halyqqa kómektesý», - dedi ol.

Aıta keteıik, oblys ortalyǵynyń 78 turǵyny óńir basshysynyń qabyldaýynda bolǵan.