Aqmola oblysynyń ákimi Astana mańyndaǵy aýyldarda zańsyz jer telimderine qatysty túsinikteme berdi (FOTO)

KÓKShETAÝ. QazAqparat - Aqmola oblysynyń ákim Sergeı Kýlagın Astananyń irgesindegi eldi mekenderde zańsyz jer telimderin ıelený máselesi boıynsha jergilikti turǵyndarmen kezdesti, dep habarlady «QazAqparat» tilshisi.

Tselınograd aýdanynyń Taıtóbe aýylynda ótken kezdesýde aımaq basshysy zańsyz jer ıelenýshilerdiń arasynda aldanyp, bireýden jer telimin aqshaǵa satyp alǵan turǵyndardyń kinási joqtyǵyn jáne bul baǵytta qurylǵan jumys toby máseleniń aq-qarasyn anyqtaý maqsatynda tekseris júrgizip jatqanyn atap ótti.

«Men áý bastan-aq adal jolmen qarjysyn tólep jer satyp alǵan turǵyndardyń eshqandaı kinási joq ekenin aıtqan bolatynmyn. Búgingi kúni meniń ótinishimmen quqyq qorǵaý organdary tarapynan barlyq tekserýler ýaqytsha toqtatyldy. Aldaǵy ýaqytta biz muny egjeı-tegjeı taldap, árbir ótinishke jeke qaraıtyn bolamyz. Soǵan saı naqty sheshim shyǵarylatyn bolady. Keıbir jer telimderine qatysty ister tek sot arqyly ǵana sheshiletin bolady. Buǵan árıne biraz ýaqyt kerek. Sondyqtan, sizderdi sabyrǵa shaqyramyn. Qazirgi kezde, jumys algorıtimi jasalynyp, jer paıdalanýshylardyń málimetter bazasy bir júıege keltirilýde. Esterińizde bolsa, osyǵan uqsas jaǵdaı Qoıandy aýylynda da boldy. Búgingi kúni biz ondaǵy jaǵdaıdy da birtindep sheshýdemiz», dedi S.Kýlagın óz sózinde.

Atap ótý kerek, Tselınograd aýdany boıynsha zańsyz jer telimderin ıelengen barlyǵy 570 oqıǵa tirkelegen. Onyń 270-i Qosshy jáne Talapker aýyldaryna tıesili bolyp otyr. Al, osyǵan deıin Qoıandy aýylynda anyqtalǵan 195 zańsyz jer telimin ıelený oqıǵasynyń búgingi tańda 15 qaralý ústinde. Qalǵandary tolyq sheshimin tapqan.