Aqmola oblysyndaǵy sottardyń ǵımaratyna eki aı buryn «bomba qoıǵan» adam anyqtaldy
Aqmola oblystyq Polıtsııa departamenti baspasóz qyzmetiniń málimetinshe, eki aı boıy polıtsııa qyzmetkerleri jalǵan habar bergen adamdy anyqtaýǵa baǵyttalǵan jedel–izdestirý is-sharalaryn ótkizdi.
«Qabyldanǵan sharalardyń nátıjesinde polıtsııa departamentiniń ekstremızmge qarsy is-qımyl bólimshesiniń qyzmetkerleri kúdiktini anyqtady, ol Batys Qazaqstan oblysy aýyldarynyń biriniń 15 jastaǵy turǵyny bolyp shyqty. Alǵashqy tergeý áreketteri barysynda jedel ýákilder jalǵan habarlamalar jiberilgen kompıýterdi tárkiledi. Qazirgi ýaqytta polıtsııa jasóspirimdi osy qylmysty jasaýǵa ıtermelegen jaǵdaılardy anyqtaýda», - dedi vedomstvodan.
Eske sala ketsek, bıylǵy jylǵy maýsymnyń 28-inde Aqmola oblysynyń Mamandandyrylǵan aýdanaralyq qylmystyq sotynyń (Potanın kóshesi 47) jáne Kókshetaý qalalyq sotynyń (Sátpaev kóshesi 8) hatshysynyń elektrondyq mekenjaıyna jarylǵysh qurylǵylar salynǵany týraly habarlama túsken bolatyn. Osyǵan uqsas mátindik habarlama óńirlik jańalyqtar portaldarynyń biriniń bas redaktorynyń atyna da jiberilgen.
Oqıǵa ornyna dereý polıtsııa departamentiniń bólimsheleri jáne basqa da shuǵyl qyzmetter jiberildi. Atalǵan ákimshilik ǵımarattar men oǵan irgeles jatqan aýmaq patrýldik polıtsııa batalonynyń kúshimen qorshalyp, qyzmetkerler men kelýshiler evakýatsııalandy, azamattardyń qaýipsizdigi qamtamasyz etildi.
Polıtsııa departamentiniń jarylys tehnıkteri men kınologtary sot ǵımarattary men redaktsııalaryn zerttep shyqty. Tekserý nátıjeleri boıynsha jarylǵysh qurylǵylar tabylmady. Sonymen birge, osyǵan baılanysty Qylmystyq kodekstiń 273-baby «Terrorızm aktisi týraly kórineý jalǵan habarlaý» boıynsha sotqa deıingi tergeý qolǵa alynǵan edi.