Aqmola oblysyndaǵy aýyz sýsyz qalǵan Egindikól aýdanynda tótenshe jaǵdaı jarııalandy
«Aqmola oblysy Egindikól aýdanynyń aýmaǵynda jergilikti aýqymdaǵy tehnogendik sıpattaǵy tótenshe jaǵdaı jarııalansyn. Egindikól aýdany ákiminiń orynbasary N.T.Qambatyrov tehnogendik sıpattaǵy tótenshe jaǵdaıdy joıý basshysy bolyp taǵaıyndalsyn jáne tehnogendik sıpattaǵy tótenshe jaǵdaıdy joıýǵa baǵyttalǵan is-sharalardy júrgizý tapsyrylsyn», - delingen Ashyq NQA portalynda jarııalanǵan qujatta.
Tótenshe jaǵdaı jarııalaý qajettigi Egindikóldiń biraz aýylyn aýyz sýmen qamtamasyz etip otyrǵan qubyrdan shyǵatyn aqaýlardyń jıileýine baılanysty týyndaǵan.
«Qorǵaljyn aýdanynyń Sabyndy aýylynda ornalasqan jerastynan alynatyn sýdy tasymaldaıtyn Nura toptyq sý qubyry Qorǵaljyn, Egindikól jáne Atbasar aýdandarynyń 30-dan astam eldi mekenderin sýmen jabdyqtaýdyń balamasyz kózi. Onyń uzyndyǵy 337 shaqyrym. Egindikól aýdany boıynsha ótetin bóligi - 95 shaqyrym. 2005-2010 jyldar aralyǵynda onyń 59 shaqyrymy jóndeldi. Qalǵan magıstaldyq sý qubyry 50 jyldan astam kúrdeli jóndeýsiz jumys istep keledi. Qubyr 90%-ǵa tozǵan. Jyl basynan beri sýmen qamtamasyz etýde jıi irkilis bar, Egindikólge sý berý turaqsyz», - dep túsindirme berilgen sheshimge.
Málim bolǵandaı, aýyz sýdyń tapshylǵy turǵyndar arasynda áleýmettik shıelenis týdyrǵan.
«Aýyz sýdyń jetkiliksiz jáne júıeli túrde jetkizilmeýi halyq arasynda áleýmettik shıelenis týdyrdy. QR Prezıdenti Qasym-Jomart Toqaevqa, Aqmola oblysynyń ákmi Ermek Marjyqpaevqa máseleni sheshý maqsatynda jergilikti aýqymdaǵy tótenshe jaǵdaı jarııalaý týraly ótinishter túsýde. Osyǵan baılanysty aýdan aýmaǵynda tótenshe jaǵdaı jarııalaý usynyldy», - delingen sheshimde.