Aqmola oblysyndaǵy aýyl mektebinde jylytý júıesi jańartyldy

KÓKShETAÝ. QazAqparat - El Táýelsizdiginiń 30 jyldyǵyn merekeleý aıasynda Aqmola oblysynda ıgi ister marafony jalǵasýda. Aktsııany qoldaýda memlekettik qyzmetshiler de belsendilik tanytýda. Qorǵaljyn aýdany ákiminiń orynbasary Daryn Sabyrǵalıdiń bastamasymen Órkendeý aýylyndaǵy mektepte pesh jabdyqtary aýystyryldy, dep habarlaıdy QazAqparat tilshisi oblystyq ishki saıasat basqarmasyna silteme jasap.

Aýdan ákimdiginen atap ótkendeı, aýyl mektebi qysqa tolyq daıyndyqpen keldi.

ıAǵnı, demeýshiler tobynyń qoldaýymen satyp alynǵan qajetti jabdyqtar jetkizilip ornatyldy.

Balasy osy mektepte oqıtyn aýyl turǵyndary úshin bul qýanyshty jańalyq boldy.

«Biz, aýyl turǵyndary, máseleni sheshýge kómekteskenderdiń barlyǵyna shynaıy alǵysymyzdy bildiremiz. Búginde 105 oqýshy jyly kabınette oqıdy», - deıdi oqýshylardyń ata-anasy Tóleýhan Bıdalov pen Bota Ospanova.

Aıta ketsek, Órkendeý aýylyndaǵy Amangeldi orta mektebi 1968 jyly salynǵan.

Búgingi tańda mektepte 11 oqý kabıneti jáne eki zerthana, sonyń ishinde mýltımedıa, ınformatıka, fızıka, lıngafon, bıologııa jáne tehnologııa kabınetteri jumys isteıdi.

Eske sala ketsek, bıylǵy jazda Qorǵaljyn aýdanynyń Alǵabas aýylynda kásipkerlerdiń qoldaýymen bastaýysh mekteptiń sý qubyry men káriz júıesi paıdalanýǵa berilgen bolatyn.