Aqmola oblysynda jylyna 60 myń tonna qus etin óńdeıtin eń iri fabrıka salynýda
Búgin aımaq basshysy Sergeı Kýlagın aýdanǵa jumys sapary barysynda atalǵan nysannyń qurylysymen tanysty, dep habarlaıdy «QazAqparat» HAA tilshisi.
«Makınsk qus fabrıkasy» seriktestiginiń dırektory Alekseı Shevchenkonyń aıtýynsha, bolashaq qus fabrıkasy 2015-2019 jyldar aralyǵynda eki kezeńmen salynyp bitpek. Jobaǵa quıylatyn ınvestıtsııanyń kólemi 39 mıllıard teńge shamasynda.
Jobany júzege asyrý barysynda «Qazaqstan Respýblıkasynyń 2015-2019 jyldarǵa arnalǵan ındýstrııalyq-ınnovatsııalyq damý baǵdarlamasy», «Bıznestiń jol kartasy-2020» jáne «Agrobıznes-2020» tárizdi memlekettik baǵdarlamalarǵa qatysý kózdelip otyr. Qus fabrıkasyn salý jańadan turaqty 700 jumys ornynyń ashylýyna múmkindik beredi. Sondaı-aq, Bulandy aýdanynyń qýat kózderimen jáne sýmen jabdyqtalý júıesin nyǵaıtady,óńirdegi shaǵyn jáne orta bıznestiń damýyna septigin tıgizedi dep boljanyp otyr. Joba jelilik qurylys kestesine saı, aldymen ınkýbator paıdalanýǵa berilip, árqaısysynda 6 taýyqhanany biriktiretin 8 alańqaı, qus etin ári qaldyqtardy óńdeý zaýyty men bólimi, ekologııalyq jáne tehnologııalyq qondyrǵylardy ornatý iske asyrylady. Qazirgi kezde nysanyń irgetasy qalanyp, ınjenerlik kommýnıkatsııa júıeleri tartylýda.
«Biz broıler ósirýmen jáne qus etin tereń óńdeýmen aınalysatyn bolamyz. Joba boıynsha kásiporyn jylyna 60 myń tonna qus etin óńdeıtin elimizdegi eń iri qus fabrıkasyna aınalýy tıis», - deıdi Alekseı Shevchenko.
Qurylys alańynda bolǵan oblys ákimi mańyzdy jobany júzege asyrý óńirde jańa jumys oryndaryn ashyp, óndiristi damytýǵa serpin beretinin erekshe atap ótti. Sonymen qatar, atalǵan qurylysqa kezeń-kezeńimen bólinetin qarjyny merziminde tolyq ıgerý máselesi de sóz boldy.