Aqmola oblysynda jeńil ónerkásip óndirisiniń kólemi 3,7 esege ósti

KÓKShETAÝ. QazAqparat - Aqmola oblysynda memlekettik qoldaýdyń arqasynda otandyq kásiporyndardyń joǵary básekege qabilettiligi úshin barlyq jaǵdaı jasalyp otyr. Óńirde metallýrgııa, tamaq ónerkásibi, hımııa jáne mashına jasaý salalaryndaǵy óndiris kóleminiń ulǵaıýymen qatar jeńil ónerkásip te belsendi damýda, dep habarlaıdy QazAqparat oblystyq ishki saıasat basqarmasynyń baspasóz qyzmetine silteme jasap.

Vedomstvonyń málimetinshe, óńirde otandyq bylǵary aıaq kıim óndirisi qarqyn alyp keledi. 2020 jyly bylǵary ónimderin óndirý kólemi 3,7 esege artty. Osy saladaǵy negizgi kásiporyndardyń biri – Tselınograd aýdanynda ornalasqan «SAMHAT» aıaq kıim fabrıkasy» JShS boldy. Kásiporyn 2008 jyly Aqmola oblysynyń Kásipkerlikti qoldaý kartasy aıasynda iske qosyldy. Óndiris qýaty boıynsha fabrıkada jylyna 500 myń jup aıaq kıim shyǵarylady. Bas dırektor Samal Tileýbaevanyń aıtýynsha, kompanııany damytý tujyrymdamasy óndiriske jańa joǵary tehnologııany engizý arqyly joǵary sapaly ónim shyǵarýǵa baǵyttalǵan.

«Bizdiń basty mindetimiz – adam densaýlyǵyna qamqorlyq jasaý. Aıaq kıimniń konstrýktsııasy jáne ol jasalǵan materıaldar barlyq gıgıenalyq talaptarǵa jaýap berýi jáne tabannyń fızıologııalyq fýnktsııalaryn qamtamasyz etýi, onyń anatomııalyq-fızıologııalyq erekshelikterine sáıkes kelýi tıis. Óndiriletin ónim sapasynyń arqasynda SAMHAT bylǵary aıaq kıimniń ulttyq brendine aınaldy», - dep atap ótti Samal Tileýbaeva.

Aıta keteıik, ónerkásipti damytý qarqyny boıynsha respýblıkalyq reıtıngte Aqmola oblysy óńirler boıynsha ekinshi orynǵa shyǵyp, TOP – 3-ke endi. Kásipkerlik jáne ónerkásip basqarmasynyń málimetinshe, lokdaýn kezeńinde kıim men aıaq kıim óndirýge mamandandyrylǵan shet elderdiń shekaralarynyń jabylýy naryqty otandyq taýarlarmen toltyrýǵa múmkindik berdi.