Aqmola oblysynda jańa qus fabrıkasy iske qosyldy

KÓKShETAÝ. QazAqparat - Arshaly aýdanynyń Jaltyrkól aýylynda quny 39 mıllıon teńge bolatyn qus fabrıkasynyń qurylysy boıynsha iri joba júzege asyrylýda, dep habarlaıdy QazAqparat tilshisi oblystyq ishki saıasat basqarmasyna silteme jasap.

Jaqynda munda «Aq-Dala Agro» JShS qus etin óndiretin qus fabrıkasynyń úshinshi kezegi iske qosyldy. Joba Nur-Sultan qalasynyń aınalasynda azyq-túlik beldeýin damytý aıasynda júzege asyrylýda.

Aýmaǵy 36 gektar jer ýchaskesinde qurylys-montaj jumystary júrgizildi, fermada tehnologııalyq jabdyqtary bar alty qus qorasy bar. Fabrıka ınkýbator, qurama jem óndirý tsehy, soıý tsehy jáne broıler ósirý orny tárizdi 4 alańnan turady. Taǵy 9 qus qorasynyń qurylysy josparlanǵan.

«Qus fabrıkasynyń qýatty 10 myń tonna taýyq etin óndirýge jetedi. 2023 jyly 22 myń tonnaǵa deıin kóteremiz», – deıdi «Aq-Dala Agro» JShS kásipornynyń bas dırektory Marat Qarsybaev.

Daıyn ónim astana, Qaraǵandy oblysynda jáne Qazaqstannyń soltústik óńirlerinde satylatyn bolady.

Kásiporyn basshylyǵy atap ótkendeı, qus fabrıkasy qurylysynyń tórtinshi kezegin iske qosý shamamen 400 jumys ornyn ashýǵa múmkindik beredi.

Aıta ketsek, jobanyń arqasynda kóptegen jergilikti turǵyndar jumys ornyn taýyp otyr. Búginde munda 150-ge jýyq adam jumys isteıdi, olardyń ortasha jalaqysy 350 myń teńgeni quraıdy.

Aqmola oblysy respýblıka boıynsha taýyq etiniń 40 paıyzyn óndiredi. Óńirde jylyna 75 myń tonnadan astam et óndiriledi.