Aqmola oblysynda jańa kirpish zaýyty salynyp jatyr

KÓKShETAÝ. QazAqparat – Aqmola oblysynyń Arshaly aýdanynda jańa kirpish zaýytynyń qurylysy júrgizilýde, dep habarlaıdy QazAqparat tilshisi.

Aýdandyq kásipkerlik bóliminiń basshysy Samat Eńsebaevtyń aıtýynsha, kirpish zaýytynyń qurylysy aýdandaǵy iri ınvestıtsııalyq jobalardyń biri. Mundaǵy ınvestıtsııa kólemi 11,2 mıllıard teńgeni quraıdy. Kásiporynda jylyna 120 mıllıon dana kirpish shyǵarylatyn bolady.

«Jyl sońyna deıin nysanǵa barlyq qajetti ınjenerlik-kommýnıkatsııalyq ınfraqurylym, onyń ishinde kirme joldar, gaz qubyry toraby, elektr jelisi tartylyp, temirjol tuıyǵy salynatyn bolady», - dedi Samat Eńsebaev.

Aýdannyń kásipkerlik bóliminiń basshysy atap ótkendeı, aýdanda qurylys salasy óńir úshin perspektıvaly baǵyttardyń biri sanalady.

«Qarqyndy damyp kele jatqan, elorda óziniń sáýletti kelbetin ózgertip qana qoımaı óńirde sapaly qurylys materıaldaryna degen suranysty arttyryp otyr. Sondyqtan, bul kirpish zaýytynyń ónimderine suranys mol bolatyny sózsiz. Sonymen birge, bul kásiporynnyń ekonomıkalyq tıimdiliginen bólek, áleýmettik jaǵynan da paıdasy bolady. Іske qosylǵan kezde 230 jańa jumys orny ashylady», - dep tolyqtyrdy Samat Eńsebaev.