Aqmola oblysynda jalǵan hattama toltyrǵan polıtsııa qyzmetkeri sottaldy

KÓKShETAÝ. QazAqparat – Aqmola oblysynda jumys kórsetkishin ulǵaıtyp kórsetý úshin ákimshilik hattamany burmalaǵan Qosshy qalalyq polıtsııasynyń ýchaskelik ınspektory sottaldy. Sot oǵan bir jylǵa bas bostandyǵynan aıyrý jazasyn taǵaıyndady, dep habarlaıdy QazAqparat tilshisi.

Aqmola oblystyq prokýratýrasy baspasóz qyzmetiniń málimetinshe, Qosshy qalasynyń prokýratýrasy polıtsııa qyzmetkeri tarapynan ákimshilik hattamalardy burmalaý derekterin anyqtaǵan.

«Máselen, ýchaskelik polıtsııa ınspektory 2021 jyldyń mamyr jáne tamyz aılarynda polıtsııada profılaktıkalyq esepte turǵan Qosshy turǵynyna qatysty Ákimshilik quqyq buzýshylyq kodeksiniń 437-baby «tynyshtyqty buzý» jáne 408-baby «ıtter men mysyqtardy ustaý erejelerin buzý» boıynsha eki hattama toltyrady. Bul rette ol quqyq buzýshynyń qoly men túsindirmesin burmalaǵan. Sonymen qatar, ol azamat 2021 jyldyń mamyr aıynda Reseıge barǵan, ıaǵnı hattama jasaý kezinde, tipti Qazaqstan Respýblıkasynyń aýmaǵynda bolmaǵan. Osylaısha, ýchaskelik ınspektor óziniń vedomstvolyq kórsetkishterin jasandy túrde arttyrdy», - dedi vedomstvodan.

Qala prokýrorynyń narazylyǵy boıynsha sot ákimshilik jaýapkershilikke tartý týraly zańsyz qaýlylardyń kúshin joıdy. Al, polıtseıge qatysty ákimshilik quqyq buzýshylyq týraly ister boıynsha dáleldemelerdi burmalaǵany úshin Qylmystyq kodekstiń 416-babynyń 2-bóligimen qylmystyq is qozǵady. Sotqa deıingi tergeýdi Aqmola oblysy prokýratýrasynyń arnaıy prokýrorlary júzege asyrdy.

«Qosshy qalalyq sotynyń úkimimen polıtsııa qyzmetkeri bir jylǵa bas bostandyǵynan aıyryldy. Osyǵan qosa, raqymshylyq aktisi boıynsha negizgi jazadan bosatylyp, bes jylǵa memlekettik qyzmet atqarý quqyǵynan aıyrý túrindegi qosymsha jaza qoldanyldy», - dep tolyqtyrdy vedomstvodan.

Úkim zańdy kúshine endi.

Aıta ketsek, budan buryn Kókshetaýda kásipkerden aqsha talap etken tótenshe jaǵdaı qyzmetkerleri sottalǵanyn jazǵan edik.