Aqmola oblysynda zaýyt aýmaǵynda gaz-aýa qospasy jarylyp, er adam zardap shekti

KÓKShETAÝ. QazAqparat – Bulandy aýdanyndaǵy «Makınsk jylý oqshaýlaý zaýyty» JShS-niń suıytylǵan kómirsýtek gazyn saqtaýǵa arnalǵan rezervýarlyq parki aýmaǵynda gaz-aýa qospasy jarylyp, 48 jastaǵy er adam zardap shekti, dep habarlaıdy QazAqparat tilshisi.

Aqmola oblystyq Tótenshe jaǵdaılar departamenti baspasóz qyzmetiniń málimetinshe, jarylys búgin saǵat 11:50-de bolǵan.

«Jarylys saldarynan 1974 jyly týǵan er adam jaraqat aldy. Qazirgi kezde onyń jaǵdaıy ortasha, denesiniń 40 paıyzy termııalyq kúıikpen aýdandyq ortalyq aýrýhanaǵa jetkizildi. Jarylystyń boljamdy sebebi – suıytylǵan kómirsýtekti gaz rezervýarlaryna quıý erejelerin buzý. Qazirgi ýaqytta polıtsııa organdary sotqa deıingi tergeý júrgizip jatyr», - dedi departament bastyǵy Nurlan Atyǵaev.

Vedomstvodan atap ótkendeı, oqıǵaǵa ornyna Aqmola oblysy Tótenshe jaǵdaılar departamentiniń jeke quramynan 8 adam jáne 2 tehnıka tartyldy. Saǵat 12:09-da órt aýyzdyqtalyp, saǵat 12:25-te sóndirildi. Órt aýmaǵy – 10 sharshy metr.

Osy rette, Aqmola oblystyq Tótenshe jaǵdaılar departamentiniń qyzmetkerleri óńir turǵyndary men qonaqtaryna órt qaýipsizdigi erejelerin saqtaý qajettigin eskertedi.

Aıta ketsek, budan buryn Aqmolada jumys istep turǵan jeldetkishti súrtpekshi bolǵan jumysshy qolynan aıyrylǵan edi.