Aqmola oblysynda úıi órtenip ketken otbasyǵa úsh bólmeli jańa páter berildi

KÓKShETAÝ. QazAqparat – Atbasar aýdanynyń Hrıaşevka aýylynda órtten zardap shekken otbasyǵa Atbasar qalasynan úsh bólmeli jańa páterdiń kilti tapsyryldy. Bul týraly aýdan ákiminiń orynbasary Abaı Bekbaev aıtty, dep habarlaıdy QazAqparat tilshisi.

Onyń aıtýynsha, jańa páterdiń kiltin aýdan ákimi Amanbek Qaljanov tapsyrdy. Páter kásipkerler men turǵyndardan jınalǵan aqshaǵa satyp alynǵan. Qajetti aqshanyń basym bóligi jergilikti kásipkerlerdiń, al qalǵany oblys jáne aýdan turǵyndarynyń esebinen jınaldy. Barlyǵy 17 mıllıon teńge aqsha jınaldy.

«Biz zardap shekken bul otbasynyń jaǵdaıyn birden baqylaýǵa aldyq. Jerleý rásimin uıymdastyrýǵa kómektestik, qajetti medıtsınalyq qyzmet, psıholog kómegin usyndyq. Kásipkerler birlesip baspana máselesin sheshýdi qolǵa aldy. Jınalǵan aqshanyń bir bóligine páter satyp aldyq, al qalǵanyn túgel atalmysh otbasyǵa tapsyrdyq. Aýdan turǵyndary atynan qıyn sátte qol ushyn sozǵan adamdardyń barlyǵyna alǵys aıtamyn», - dedi A.Qaljanov.

Óz kezeginde zardap shekken otbasynyń músheleri kásipkerler men turǵyndarǵa baspanamen qamtamasyz etip, materıaldyq kómek kórsetkeni úshin alǵys bildirdi.

Aıta keteıik, 29 shildede Atbasar aýdanynyń Hrıaşevka aýylyndaǵy jeke úıde órt shyǵyp, 3 bala kóz jumǵan bolatyn.