Aqmola oblysynda ÚEU málimetter bazasyn jańǵyrtý máselesi talqylandy
Óńirlik kommýnıkatsııalar qyzmetinde ótken brıfıngke Aqmola oblystyq ishki saıasat basqarmasynyń basshysy Aına Mysyrálimova, «Aqmola oblysy boıynsha azamattyq alıansy qaýymdastyǵy» zańdy tulǵalar birlestiginiń jetekshisi Irına Terenteva jáne memlekettik kirister departamentiniń bólim basshysy Álııa Ótekına qatysty.
«Búgingi kúni elimizde 15 myńnan astam úkimettik emes uıym bolsa, bizdiń oblysymyzda olardyń sany myńnan asady. Alaıda, búgingi tańda onyń 559-y tirkelgen bolsa, 110-y jumys istemeıdi. Sol sebepti olardyń málimetter bazasyn jańǵyrtý isi júrgizilýde», - dedi Aqmola oblystyq ishki saıasat basqarmasynyń basshysy Aına Mysyrálimova.
Atalǵan basqarmanyń úkimettik emes uıymdarmen jumys bólimi basshysynyń mindetin atqarýshy Serik Sádýaqasovtyń aıtýynsha, bul shara uıymdardyń qyzmetiniń ashyqtyǵyn, nemen aınalysatyndyǵyn, basqa da oǵan qatysty aqparattar túrinde jınaqtalyp, jurtshylyq nazaryna usynylady. Málimetter bazasynda tirkelmegen úkimettik emes uıymdar konkýrstarǵa qatysyp, memleket tarapynan beriletin granttarǵa tapsyrys bere almaıdy. Qazirgi kúni Din isteri jáne azamattyq qoǵam mınıstrligi «Málimetter bazasyn daıyndaý týraly» zań jobasyn daıyndaýda. Bul máselege erekshe mán berilýiniń sebebi qaptap ketken úkimettik emes uıymdardyń jumysyn retke keltirý jáne olardyń ashyqtyǵyn qamtamasyz etý bolyp tabylady.
Sonymen qatar, brıfıngte «Aqmola oblysy boıynsha azamattyq alıansy qaýymdastyǵy» zańdy tulǵalar birlestiginiń jetekshisi Irına Terenteva men oblystyq memlekettik kirister departamentiniń bólim basshysy Álııa Ótekına málimetter bazasyna beriletin málimetter formasyn toltyrý jaıy men memlekettik granttar alyp nemese konkýrstarǵa qatysý arqyly qarjylandyrylatyn úkimettik emes uıymdardyń salyq organdaryna esep berý tártibi týraly aıtyp berdi.