Aqmola oblysynda týrısterge 12,8 mlrd teńgege qyzmet kórsetilgen

BÝRABAI. QazAqparat – Aqmola oblysy ákiminiń orynbasary Eldos Ramazanov óńirdegi týrızmdi damytý sharalary týraly aıtyp berdi, dep habarlaıdy QazAqparat tilshisi.

«Aqmola oblysy Qazaqstandaǵy týrızmdi damytý draıverleriniń bestigine kiredi. Munda Şýche-Býrabaı, Zerendi kýrorttyq aımaqtary, úsh memlekettik ulttyq tabıǵı park, ıÝNESKO tizimine engizilgen Qorǵaljyn tabıǵı qoryǵy ornalasqan», - dedi Eldos Ramazanov Mádenıet jáne sport mınıstrliginiń týrızmdi damytý máseleleri jónindegi kóshpeli alqa otyrysynda.

Respýblıka boıynsha týrızm salasynda qyzmet kórsetýde Aqmola oblysynyń úlesi shamamen 10% quraıdy, bul salada 600-den astam kásiporyn jumys isteıdi.

«Salanyń negizgi kórsetkishteri boıynsha turaqty oń dınamıka baıqalady. Kórsetilgen qyzmetter kólemi 12,8 mlrd teńgege jetip, 2021 jyldyń sáıkes kezeńimen salystyrǵanda 1,6 esege ósti, osylaısha bizdiń oblys respýblıka boıynsha úshinshi orynda tur», - dedi Eldos Ramazanov.

2022 jyldyń qorytyndysy boıynsha óńirdegi ishki týrızm aǵyny 15 paıyzǵa ósip, 1 mln kelýshiden asqan.

«Ótken jyly «Kedrovyı bor», «Dom ý ozera» syndy birqatar nysan paıdalanýǵa berildi. Negizgi kapıtalǵa salynǵan ınvestıtsııa 30 paıyzǵa ósip, 17,6 mlrd teńgeni qurady. Jaqyn arada «Aqbýra rezort» iri ınvestıtsııalyq jobasynyń qurylysy aıaqtalady, bul aımaqtaǵy eń basty otbasylyq demalys ortalyǵy bolady», - dedi E. Ramazanov.

Aıta keteıik, Býrabaı kýrortynda QR Mádenıet jáne sport mınıstrliginiń týrızm salasyn damytýǵa arnalǵan keńeıtilgen alqa otyrysy ótip jatyr.