Aqmola oblysynda til mártebesin kóterý jóninde usynystar aıtyldy

KÓKShETAÝ. QazAqparat – Aqmola oblysynda Qazaqstan Táýelsizdiginiń 30 jyldyǵyna arnalǵan «Álem elderiniń memlekettik tilderge degen kózqarasy» taqyrybynda respýblıkalyq ǵylymı-tájirıbelik konferentsııa ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Konferentsııany Aqmola oblystyq soty men Shoqan Ýálıhanov atyndaǵy Kókshetaý ýnıversıteti birge uıymdastyrdy.

«Memlekettik rámizderdiń ajyramas bóligi – memlekettik til. Memlekettik tildiń mańyzy týraly biz árqashan másele kóterip, jylda úlkendi-kishili jıyndarda talqylap, sheshim qabyldap júrdik. Búgin til máselesin biz jańa turǵysynan talqylap, álem elderiniń memlekettik tilderge degen kózqarasyn zertteý maqsatynda jınalyp otyrmyz»,- dep atap ótti konferentsııany ashqan Aqmola oblystyq sotynyń tóraǵasy Dosjan Ámir.

Aqmola oblystyq soty baspasóz qyzmetiniń málimetinshe, konferentsııada óńirdegi sottarda memlekettik tildiń qoldanylý aıasyn keńeıtý boıynsha júrgizilip jatqan jumystar týraly baıandamalar tyńdaldy.

Sh.Ýálıhanov atyndaǵy Kókshetaý ýnıversıtetiniń professory Berdibaı Shalabaı, zań ǵylymdarynyń magıstri Erlan Naýryzbaev óz baıandamacynda jergilikti ákimshilikke memlekettik tilde shyǵarylyp jatqan qujattarǵa monıtorıng júrgizý, qazaq tilinde bilim beretin oqý oryndarynyń sanyn kóbeıtý, memlekettik qyzmetshilerge qoǵam aldynda, BAQ-ta memlekettik tilde sóıleýdi talap etý, memlekettik tildi bilý paryz ǵana emes, zańmen mindet etip kórsetý, quqyq qorǵaý organdary jańa engizilgen zańdardy memlekettik tilde talqylaý kerektigine basa nazar aýdardy.

Arshaly aýdandyq sotynyń sýdıasy Oljas Shalabaev:

«Álem elderiniń tájirıbesine súıene otyryp, tildi damytýdyń túrli tásilin atap ótti, qazaq tiliniń damýy úshin qatań zań emes, ıntellektýaldy strategııa kerek», – dedi.

Al, advokat Ardaq Bátıeva memlekettik qyzmetke úmitkerlerden test kezinde memlekettik tildi bilýin talap etý qajettigin atap ótti.

«Sot, quqyq qorǵaý organdary, qorǵaýshy bolam degen úmitkerdiń memlekettik qyzmetke ótý maqsatynda memlekettik tildi bilý deńgeıin anyqtaý úshin tapsyratyn testileý suraqtary esepke alynsa oń nátıje bereri sózsiz jáne memlekettik tildiń mártebesin kóterýge zor yqpalyn tıgizer edi», – dedi ol.

Aqmola oblystyq sotynyń tóraǵasy Dosjan Ámirov qararda memlekettik tildi qoldaný boıynsha baqylaýdy kúsheıtýge, til zańnama normalarynyń buzylýyn anyqtaý jáne jol bermeý maqsatynda barlyq sharalardy qabyldaýǵa, memlekettik organdarǵa sottarǵa talap qoıý aryzdaryn memlekettik tilde joldaý týraly mindetteme qoıý sııaqty talaptar qarastyrylatynyna nazar aýdardy.

Aıta keteıik, bul konferentsııa el egemendiginiń mereıtoıyna oraı óńirde ótkiziletin birqatar is-sharalardy tolyqtyryp otyr.