Aqmola oblysynda sút óndirisi 32,3 myń tonnaǵa ulǵaıtylmaq

KÓKShETAÝ. QazAqparat – Aqmola oblysynda sút óndirisin arttyrý baǵytynda alǵash ret jeńildetilgen nesıe baǵdarlamasy júzege asyryla bastady, dep habarlaıdy QazAqparat tilshisi.

Aqmola oblystyq aýyl sharýashylyǵy basqarmasy baspasóz qyzmetiniń málimetinshe, óńirdiń agroónerkásiptik keshenin damytý baǵytynda memleket tarapynan aıtarlyqtaı qoldaý kórsetilip keledi. Bıyl qoldaý kólemi 106 mıllıard teńge boldy, onyń jartysyna jýyǵy nemese 46,6 mıllıard teńgesi – qaıtarymsyz sýbsıdııa.

«Oblysta sút óndirisin arttyrý baǵytynda alǵash ret jeńildetilgen nesıe baǵdarlamasy júzege asyryla bastady. Jalpy, 6 myń sıyrǵa arnalǵan 7 arnaıy taýarly sút fermasyn salý úshin 15 mıllıard teńge jeńildetilgen nesıe beriledi. Bul jobalardy júzege asyrý oblysta sút óndirisin 32,3 myń tonnaǵa ulǵaıtýǵa múmkindik beredi», - deıdi vedomstvodan.

Sonymen birge, óńirde «Aýyl Amanaty» aýyl halqynyń tabysyn arttyrý baǵdarlamasy boıynsha birinshi kezeńde aýyl turǵyndary úshin 1,2 mıllıard teńgege (ortasha qaryz – 4,8 mıllıon teńge) 250 shaǵyn nesıe berý arqyly 265 jumys ornyn ashý josparlanǵan.

«Aýyl sharýashylyǵy salasy Aqmola oblysy ekonomıkasynyń negizgi sektorlarynyń biri sanalady. Sol sebepti, aýyl halqyn qoldaý jáne jumyspen qamtý maqsatynda bólinetin nesıe aýyl sharýashylyǵy ónimderin óndirýdiń barlyq derlik baǵyttaryn (et jáne sút mal sharýashylyǵy, jylqy sharýashylyǵy, qoı sharýashylyǵy, qus sharýashylyǵyn damytý, kartop pen kókónis ósirý) qamtıtyn bolady», - dep tolyqtyrdy vedomstvodan.

Aıta ketsek, budan buryn elimizdegi árbir úshinshi tonna et Aqmola oblysynda óndiriletin jazǵan edik.