Aqmola oblysynda sýmen jabdyqtaý boıynsha jumystar júrgizilip jatyr
Energetıka jáne turǵyn-úı kommýnaldyq basqarmasynyń málimetinshe, oblysta memlekettik baǵdarlamalar aıasynda 7 jobany iske asyrýǵa qarajat bólindi, respýblıkalyq bıýdjetti naqtylaýǵa taǵy 25 joba maquldandy. Zerendi aýdanyndaǵy aýyldyq eldi mekenderdiń sýmen jabdyqtaý nysandarynyń jaı-kúıin jaqsartý maqsatynda ótken jyly 46 shaqyrymnan astam jeli jóndeldi, 100-den astam taratýshy qudyq, onyń ishinde 49 órt gıdranty, uńǵymalar men sorǵy stantsııalary ornatyldy. Sýmen jabdyqtaý obektileriniń daıyndyǵy búgingi kúni 89 paıyzǵa jetti.
Degenmen, osy baǵyttaǵy jumys jalǵasýda. Turǵyn úı-kommýnaldyq sharýashylyq, turǵyn úı ınspektsııasy, jolaýshylar kóligi jáne avtomobıl joldary aýdandyq bóliminiń basshysy Marat Júnisovtiń aıtýynsha, 2020 jyldyń qarasha aıynda óńirdiń 6 eldi mekeninde jalpy uzyndyǵy shamamen 20 shaqyrym bolatyn sýmen jabdyqtaý jelisine jóndeý júrgizý úshin birqatar ótinim ázirlenip joldandy.
«Sonymen qatar, 2021 jylǵa arnalǵan aýdandyq bıýdjet qarajaty esebinen 5 aýyldyq eldi mekende sý qubyry jelisin aǵymdaǵy jóndeý boıynsha sýmen jabdyqtaý salasyndaǵy is-sharalar qaralady. Zerendi aýdanynyń Aqkól aýyldyq okrýginde qarasty Qazaqstan, Aqkól, Molodejnyı aýyldaryndaǵy sý qubyrlaryn jóndeý jumystaryn qamtý josparlanýda», - deıdi Marat Júnisov.
Aıta keteıik, bıyl oblysta 6 jobany iske asyrý esebinen qalalyq eldi mekenderdiń 98,8 paıyzyn, aýyldyq eldi mekenderdiń 84,1 paıyzyn ortalyqtandyrylǵan sýmen jabdyqtaý josparlanyp otyr.