Aqmola oblysynda sýǵa batqan balyqshynyń denesi tabyldy
Aqmola oblystyq Polıtsııa departamenti baspasóz qyzmetiniń málimetinshe, Tselınograd aýdandyq polıtsııa bólimine kezekshi bólimine jergilikti turǵyn habarlasyp, 1960 jylǵy ákesiniń joǵalǵanyn aıtqan.
Áıeldiń sózinshe, ákesi 14 sáýir kúni saǵat 06:00-de balyq aýlaýǵa ketip, qaıtyp oralmaǵan.
«Polıtsııa qyzmetkerleri qutqarýshylarmen birlesip, izdestirý sharalaryn uıymdastyrdy. Sonyń nátıjesinde sáýirdiń 16-da joǵalǵan adamdy TJD Jedel-qutqarý jasaǵynyń súńgýirleri Tselınograd aýdanynyń Qabanbaı-batyr aýyly mańyndaǵy «Qarasý» sý qoımasynan alyp shyqty. Qazirgi ýaqytta polıtsııa qaıǵyly oqıǵanyń mán-jaıyn anyqtap jatyr. Saraptama taǵaıyndaldy», - dedi vedomstvodan.
Osy rette, tártip saqshylary aqmolalyqtarǵa qazirgi kezde kez-kelgen sý qoımasynan balyq aýlaý qaýpti ekenin eske salady.
Aıta ketsek, budan buryn Aqmola oblysynda bir tabyn jylqy muz qursaýynda qalǵanyn jazǵan edik.