Aqmola oblysynda stýdentter men NEET sanatyndaǵy jastarǵa qandaı qoldaý kórsetilýde

KÓKShETAÝ. QazAqparat - Aqmola oblysynda aǵymdaǵy jyly jastardy damytý men qoldaýǵa 500 mıllıon teńgeden astam qarajat bólindi. Stýdentter men NEET sanatyndaǵy jastarǵa qandaı qoldaý kórsetilip jatyr. Bul týraly jýrnalıstermen ótken brıfıngte oblystyq ishki saıasat basqarmasynyń basshysy Altynaı Ámirenova málim etti, dep habarlaıdy QazAqparat tilshisi.

Basqarma basshysynyń aıtýynsha, elimizde jastardy qoldaýdyń 2020-2025 jyldarǵa arnalǵan keshendi jospary júzege asyrylýda. Osyǵan baılanysty oblysta bıylǵy jyly jastardy damytý men qoldaýǵa 500 mıllıon teńgeden astam qarajat bólindi.

«Bul somaǵa oblystyq bıýdjetten 250 mıllıon, qalalyq jáne aýdandyq bıýdjetterden 250 mıllıonnan astam, sondaı-aq jastar jáne otbasy saıasaty salasynda memlekettik áleýmettik tapsyrystyń 11 lotyn iske asyrýǵa 65 mıllıonǵa jýyq qarajat kiredi», - dedi basqarma basshysy.

Brıfıngte aıtylǵandaı, Aqmola oblysynda búginde 14-29 jas aralyǵyndaǵy 153 382 adam turady, bul oblys halqynyń 20 paıyzy. Aýyl jastarynyń sany – 84 892, qala jastarynyń sany – 68 490. Oblys boıynsha 15-28 jas aralyǵyndaǵy NEET sanatyndaǵy (jumys istemeıtin, bilimi nemese kásibı daıyndyǵy joq jastar) jastar sany 11 599-dy qurady. Bul sanatta dekrettegi jas áıelder, maýsymdyq jumysshylar men múgedekter bolǵandyqtan, monıtorıng nátıjeleri boıynsha naqty sany 2 298 adamdy quraıdy. Jumyspen qamtý organdarynda jumyssyz bolyp tirkelgen jastar olardyń kelisimimen qoǵamdyq jumystarǵa, áleýmettik jumys oryndaryna, jastar praktıkasyna, kásiptik daıarlaýǵa, qaıta daıarlaýǵa, biliktiligin arttyrýǵa jiberiledi.

«Jyl basynan beri «Eńbek» baǵdarlamasyna 4 985 adam qatysyp, 4 722 adamdy jumysqa ornalastyrdy, onyń ishinde bos jumys oryndaryna – 3 308, aqyly qoǵamdyq jumystarǵa – 745, áleýmettik jumys oryndaryna – 155, jastar tájirıbesine – 454. Sondaı-aq, alǵashqy jumys ornyna 53 adam ornalastyryldy. Qysqa merzimdi kýrstarda 168 bala oqydy, 209 – grant aldy, 55 – shaǵyn nesıe aldy, 460 – «Bastaý bıznes» jobasy boıynsha oqydy», – dep tolyqtyrdy Altynaı Ámirenova.

Basqarma basshysy atap ótkendeı, qazirgi kezde óńirde ómirlik qıyn jaǵdaıǵa tap bolǵan jastardy jumyspen qamtý jáne jumysqa ornalastyrý úshin jalpy somasy 2,5 mıllıon teńgeniń jumystary júrgizilýde. Búginde áleýetti ónim berýshimen kelisimshart jasaldy. Sonymen qatar, NEET sanatyndaǵy jastardy áleýmettendirý úshin oblystyq jastar resýrstyq ortalyǵynyń janynan arnaıy bólim ashyldy.