Aqmola oblysynda sheneýnikter kásipkerlerden para alǵan
Aqmola oblysy boıynsha Sybaılas jemqorlyqqa qarsy is-qımyl departamenti baspasóz qyzmetiniń málimetinshe, bıylǵy jylǵy maýsymnyń 14-inde Kókshetaý qalalyq soty QR AShM Agroónerkásiptik keshendegi memlekettik ınspektsııa komıtetiniń Kókshetaý qalalyq aýmaqtyq ınspektsııasy basshysynyń mindetin atqarýshy bolyp istegen Erlan Tastanovqa qatysty aıyptaý úkimin shyǵardy. Sot úkimimen oǵan 2 500 000 teńge kóleminde aıyppul túrinde jaza taǵaıyndaldy.
Sonymen qatar, sot Kókshetaý qalalyq aýmaqtyq ınspektsııasynyń bas mamany - ósimdikter karantıni jónindegi ınspektory Aınagúl Ismaılovaǵa da 2 000 000 teńge kóleminde aıyppul saldy.
«Tergeý barysynda anyqtalǵandaı, Tastanov pen Ismaılova aldyn ala sóz baılasyp, 2022 jyldyń qańtar-aqpan aılary aralyǵynda ákimshilik jaýapkershilikke tartylmaýy jáne karantındik sertıfıkattardy is júzinde tekserýge shyqpastan bergeni úshin kásipkerlik sýbektilerinen para jáne aldaý arqyly zańsyz materıaldyq syıaqy alǵan», - dedi vedomstvodan.
Sot aıyptalýshylardy ómir boıyna memlekettik qyzmette jáne kvazımemlekettik sektorda laýazymdy qyzmet atqarý quqyǵynan aıyrdy. Sonymen birge, sot jeke kásipker ókili Aına Qazenovany para berý deregi boıynsha kináli dep tanyp, oǵan 300 000 teńge kóleminde aıyppul saldy.
Sot úkimi zańdy kúshine engen joq.
Aıta ketsek, budan buryn Aqmola oblysynda áleýmettik qyzmet kórsetý ortalyǵynyń basshylyǵy 17 mln teńgeni jymqyrǵany jarııalanǵan bolatyn .