Aqmola oblysynda saıası qýǵyn-súrgin qurbandaryn eske alý sharasy ótti

KÓKShETAÝ. QazAqparat - Búgin Kókshetaýda saıası qýǵyn-súrgin jáne asharshylyq qurbandaryn eske alý kúnine arnalǵan «Tarıhtan taǵylym-ótkenge taǵzym» atty dóńgelek ústel ótti, dep habarlaıdy QazAqparat tilshisi Aqmola oblystyq ishki saıasat basqarmasyna silteme jasap.

Vedomstvonyń málimetinshe, sharaǵa oblys ákiminiń orynbasary Aına Mysyrálimova, jergilikti ǵylymı jáne shyǵarmashylyq zııaly qaýym, etnomádenı jáne úkimettik emes birlestikter ókilderi qatysty. Kezdesýde Aına Mysyrálimova tarıhymyzdyń qaralyp otyrǵan kezeńi - qazaq dalasynyń zııalylarynyń joıylýyna ákelgen, ulttyń túsin joıǵan, júzdegen myń adamnyń ómirin qıǵan jáne halyqtyń genofondyna orny tolmas zııan keltirgen eń qaıǵyly kezeń ekenin erekshe atap ótti.

«Stalındik qýǵyn-súrgin bul bizdiń tarıhymyzda endi qaıtalanbaýy tıis. Búgin biz asharshylyq qurbandaryn eske sala otyryp, sol qorqynyshty kúnder týraly jańa derekterdi taýyp, jarııa ete otyryp, jazyqsyz qaza tapqandardyń esimderin qalpyna keltirýimiz kerek. Ótken jyly Memleket basshysy «saıası qýǵyn-súrgin qurbandaryn tolyq aqtaý jónindegi memlekettik komıssııa týraly» Jarlyqqa qol qoıdy. Osy jyldyń basynda Saıası qýǵyn-súrgin qurbandaryn aqtaý jónindegi Aqmola komıssııasy quryldy. Bizdiń óńirde saıası qýǵyn-súrgin qurbandaryn tolyq ońaltý boıynsha birqatar jumystar bastaldy», - dep atap ótti Aına Mysyrálimova.

Osy qıyn kezeń týraly Sh.Ýálıhanov atyndaǵy Kókshetaý ýnıversıteti rektorynyń keńesshisi Amanaı Seıtqasymov óz oıymen bólisti. Saıası qýǵyn-súrgin qurbandaryna qatysty tarıhı ádilettilikti qalpyna keltirý isindegi basty mıssııa - bul jastardy erlik sabaqtarynda jáne otandastarymyzdyń patrıotızmi úlgilerinde tárbıeleý. Mundaı pikirdi Aqmola oblysynyń týmalary, «Alash» partııasynyń qaıratkerleri – «Alash arysy Bilál Maldybaıuly» jáne «Haıretdın Bolǵanbaev – óshpes juldyzdyń jaryǵy» týraly kitaptardy tanystyrǵan saıasattanýshy Dostyq Kámelov pen Sh.Ýálıhanov atyndaǵy Kókshetaý ýnıversıtetiniń stýdenti Erden Nurahmet te bildirdi.

Saıası qýǵyn-súrgin qurbandaryn tolyq aqtaý máselesi keń aýqymdy mindetterdi qamtıdy. Munda etnostardy týǵan jerlerinen kúshtep kóshirý máseleleri erekshe oryn alady. Deportatsııalanǵan halyqtardyń bastan keshken qıynshylyqtary týraly QR Prezıdenti janyndaǵy Memlekettik basqarý akademııasynyń Aqmola oblysy boıynsha fılıalynyń dırektory Bella Gazdıeva aıtyp berdi.

Dóńgelek ústel otyrysy pikir almasýmen jalǵasty, qatysýshylar el tarıhyndaǵy saıası qýǵyn-súrgin men asharshylyq týraly óz oılarymen bólisti.

Sońynda otyrystyń qorytyndysy shyǵarylyp, osy baǵytta bolashaqqa josparlanǵan is-sharalar, onyń ishinde saıası qýǵyn-súrgin qurbandaryn aqtaý týraly óńirlik komıssııanyń jumysy talqylanyp, belgilendi.